Diyon 19:14-23

¹⁴Lan o Nopalegi Hagalena ana lan lovivina, ge sauga o iyaka kelaubwa alalati bwagatau. Yaka Pilato i baek Yudiya elal i ba, “Wami kin iya hiwe.”

¹⁵Yudiya hi yoga hi ba, “U ahe u egonan! U ahe u egonan! U na u lokolosan!” Pilato i nelil i ba, “Nuwamiu wami kin na lokolosan?” Topowon bwabwatal anana hi lahe hi ba, “Nige wama kin etega al i gagan, iyai ya te Sisa maisena.”

¹⁶Yaka Pilato Yeisu i talamwan elal ge nihi lokolosan. Inoke tolohaveyan Yeisu hi ahe.

¹⁷Totona ana kolos hi pakalivai ge i tagil panuwa tolinaa i na labi toto hi ba “Pana Babaloma.” (He pana Hibilu hi ba “Goligota.”)

¹⁸Inoke hi lokolosana to. Gamagalau labui alonau hi lokolosil, etegana ana kolos hi pamilila labena awonaa, ge etegana labena gegebanaa, yaa Yeisu i minaa luwaluwala.

¹⁹Pilato leleli etega i ginol ge i ba hi tagahikan Yeisu ana kolos elana. Leleli i ba, “Yeisu gagama Nasaleta, Yudiya wali kin.”

²⁰Yudiya hi gewi leleli o hi vasili, kaiwena labi toto Yeisu hi lokolosana nige ana bwaga i yayapu panuwa bwabwatana elana, ge leleli o hi leli pana Hibilu, pana Loma ge pana Gilik elana.

²¹Yudiya wali topowon bwabwatal hi nok hi na Pilato elana hi ba, “Binimala bahi nu leleli ola te, ‘Yudiya wali kin.’ Yaa nu leli te, ‘Tau ya i ba: Nau Yudiya wali kin.’”

²²Pilato analiya i lahe i ba, “Leleli toto iyaka ya leli, he iyaka ya leli.”

²³Sauga tolohaveyan Yeisu hi lokolosan haba, yaka ana kaliko hi ahe ge hi wali, he teli wali ana gewi esopali, tolohaveyan maisena ge maisena tomaha ona ali kaliko. Ana holahola awaa al hi ahe, ge hi kite kaliko maisena ya te elana hi ginoliya, ge nige ana hel tubwi i gagan.