SAM 89:7-45

⁷Sike angelata paut tasikengu gae akgwaukaing. Siwan angela wa kuupbamda ga takumbasike gae akgwaukaing.

⁸Buyambam tapa, ga Anutu kekekngaka bamban tapa, aminu tapatu kekeknga buyambamu gata pake yuayak binga wena. Sike ga wamu ayanggayak takngakan asinggan tawanggayak. Ga tapatekwana kaya dua daknganggayak.

⁹Siwan gata yanggabamu kekekngana kaya gwenu kayuak. Sike sambuita enawanu gata yawi kuma siknga yuak.

¹⁰Gata Isip nana amindane kekekngana kuupbam gwa zipbuke pasiwi maiking. Siwan gikane kekeknga aknganeta iwanda gwa yapbike yanikwasiwi datakuking.

¹¹Sike yekapat gatu kepdakaat ngangu gikanekan. Gata kepdaka tasike sangabamu undang yuaing kaya pasike pekuyak.

¹²Siwan gatakan keu kuupbam pasike tekuyak. Tawanu Tabor dakaat gatu Hermon dakaat ngang aminda taikaing binga umandae apbakngake gae kap taikamayak.

¹³Gatane kekekngaka buyambam siknga. Kekekngaka inata siknga kundu yuak.

¹⁴Gata king kapa yuke aminu kuupbam noman takngane kayuwayak. Sike aminu wam yot gwene usanzikgayak kaya noman gan tasinggayak. Gata amin kuupbamde take natayamuke wamu ayanggayak takngakan asinggan tawake ga tapatekwan ba dua singgayak.

¹⁵Sike aminbamda umanda yatangenakaingu apbaknganing. Aminbamda gae wesim kuke sukukaingu wa unzing kakaa akngane sukukaing. Siwan waaminda apbaknganing.

¹⁶Sike waaminu umanda kopsa akngae kwakngaom gatu zikaane ngangu apbakngake yatangenakaing. Ngan, gata puya noman nomana akngakan ie tasinggayakge kan natanggamatake apbakngakaing.

¹⁷Dasingge, gata ninu kekekanimi umaninda kopsa aknga siwan ninda asiknga bakngakamang. Ngan, gata musip kwikwik natanimuke gatanimuwawi ninda kekekake amak kaknga yapikamang.

¹⁸Siakan. Gata gika nindane kuyanin yuak kapa yawi yuak. Ngan, ga ninu Isrel amindane Anutunin, gata king kapa ninde nimunangge yawi yuak.

¹⁹Tupa siknga gata mia takngatu puya aminda sikngae yamukuyak. Yamuke anzing yanikuyak, “Nata amak aminu tupan sikngaapa gwa yawa yukut. Siwan nata kinggane kupna gwapakngine gwapungamukum. Nata aminbamde banakan take waapa tewa king kapa yuak.

²⁰Ngan, nata Deviu king kapa dakngawikge wel gwapakngane tukwamba gindane king kapasa dakngakut. Natane puya amin tapanan.

²¹Unzingge natane kekekngana iat gatake asinggan yuwik. Sike nata kekekangama kekeknga yuwik.

²²Sike iwanata amak tasike i yapbitnanga dua. Aho, wai aminda dua tasiwa maiwik.

²³Siwan nata itane iwana yainggamumbit. Ngan, aminu waakwau ie apbitaningu atzipa kumning.

²⁴Sike ie nata take natangamuke iat gatake asinggan yutzim. Sike kaawa iat iwanaat amak tasiwan kakengu nata tasiwa iwana ayapbimbik.

²⁵Siwan kepna imiu yanggabamu Mediterenian gweneta kuku yangga buyambam tapatu Yufretis ngang inikaingune sandewik.

²⁶Sike ita nae naninggamatake anzing yawik, ‘Ga natane nana. Siwan natane Buyambam tapana. Gata nae kakuya tasike asinggan gatangamunggayak,’ ngang yawik.

²⁷Siwana nata yawa waaknga tupan tapa dakngake kingu kepna kepna yuaingu kuupbam yapbimbik.

²⁸Sike nata ie take siknga asinggan natangamit. Siwana nata pasap wamu takngatu ie tasiwa pasap taknga nit katang asinggan asinggan yuwik.

²⁹Ngan, aminu itane dongane nana tapatuta kingu asinggan dakngawik. Siwan itane dongane nana kingu waapata Isrel nana aminu asinggan kayuwik. Unzing sanga ena kakaa komune yuaingu asinggan yuaing binga.

³⁰Siwan ngana itane bapuna masan aatningga natane mama wama ayama sandeke,

³¹natane noman taknga dua ba tawaning, ba natane wamae masa imuke mama wama dua ba tawaning.

³²Ayok! Nata wai aknganae natapa kuwan nata meya yake yamit. Siwan nata gutongana tasikaingge natake atzipmake toknga yamit.

³³Siwan ngana tapduu waomune Devitde dongge take siknga natangamit, tendeknga wena. Sike natanu i dua teke, wamu ie yawa kekekakut taknga dua tewit.

³⁴Sike nata pasap wam taknga iat tasikumau dua zipbuwit. Siwan tapatekwan wamu takngatu wamaatangu genaneta dua yawit.

³⁵Na Anutu noman takngakan tasinggat tapanin. Na waakngae natapa siwan wamu waaknga yawa kekekakut. Nata sipdukan yawa wamu waaknga asinggan asinggan yuwik. Wamu kekeknga waaknga anzing, nata Deviu kemu dua iniwit.

³⁶Sike wamu inikumu itane bapuna wena dua sining. Waakwau asinggan yutning. Siwan gunzitda yuak binga itane dongata aminbamdane tupan tapaapa dakngake komdubam siknga unzing kayutning.

³⁷Sike waakwaau asinggan yutning. Unzing yakau kakaa nimunggakga aminbam yeuyaman natane wama siakan gan siwikgen siking.”

³⁸Siwan ngana apmanu kingu gika yawi yukut tapae kaanga natangamunggayak. Kaanga natangamuke gata i gwa teke masa imunggayak.

³⁹Sike wamu takngatu puya amindaat yawat kekekakut taknga gwa sandekgayak. Sandeke kinggane kup daka gwapungamukuyau gwa sandeke kepdakane mumbi wasap sikut.

⁴⁰Gata itane damanu yotbam gapmae tasibasikuu gwa zipbuke yotna kekeknga gwegwenu apasiwi maiking.

⁴¹Sike aminbamde wagwak saak kuke sangana kakengu kukwae apakaingunin. Kukwae pake notna iat wesim yuaingga sapdut wamu inikaing.

⁴²Ngan, gata itane iwana akapewi amak tasike ayapbiking. Siwan gata pasiwi musip gwaang natapbing.

⁴³Gata tasiwi itane amak amina dua kekekake ambing. Siwan amak tasikaing ngana gata dua gatangami tiuukake apimakut.

⁴⁴Gata umana kopsa king ngang iniking kaknga sandewi umana waaknga gatu dua yuak. Dua yuke aminu gatu dua kayuak.

⁴⁵Gata tasiwi aminuake zet siknga siwan maaknga buyambam takngata usukwatapbut.