SAM 78:11-58

¹¹Sike sanga ita pasikutde apbotaking. Siwan duya takngatui waaminde kaine yeuyamukut kaa kuut abotaking.

¹²Siwan bapunatane kaine Anututa duya takngatu keu Soan yot gapma Isip kep komu yuwaune tasikut.

¹³Ita yanggabam gwenu wesiwan kaukaut kuwan daman binga dakngawan Isrel nana banakan tapane yanipakapbut.

¹⁴Sike gunzit tapane i minga musiaatang yuke ita waaminde tupan kukut. Gatu zikaane katap gwendane kakaa akngaatang yuke tupanu ita kukut.

¹⁵Gatu ita sanga wena kepban komune kuke sup gwegwen zipan yangga buyambam siknga apaapata undangga akopbut. Akopan waakwakga tangopan take sikut.

¹⁶Ita tasiwan yangga sup ganang katangga akoke yangga buyambamu mekngan katangga akoke zipmakaing binga zipbut.

¹⁷Siwan ngana waaminda waiaknga Anutu enane siknga yuak kapae tasiking. Sike wa tasikingu sangana wena kepban komune yuke yamandeu tasiking.

¹⁸Waaminda Anutu tanzike anzing tasiking. Sike waaminda nanamu napan take siknga singgak kapa Anututa yamikge kumzang yanggamataking.

¹⁹Waaminda Anutue sapdut wamu anzing yaking, “Asikaya Anututa ninde nanamu kepban kopatang kwaapzang siknga apme nimik ba dasing,” ngang yaking.

²⁰Siakan, ita sup gwen tanguwan yangga buyambamu undangga akopbing. Siwan ngana dasingge? Ita ninu aminabamde poyak kat gatu kaap kat apme ba nimik, ba dasing?

²¹Ayok. Buyambam tapata waamindane wamna natake kaanga siknga natapbut. Kaanga natake ita katau enandangga Jekopdane dongge tewan epbut. Sike Isrel nana aminde kaanga natapbut taknga kuku buyambam siknga sikut.

²²Dasingge, waakwau Anutue baniu dua siking. Siwan anzing natapbing, “Apmea ba gataniman take yutnim, ba dasing?”

²³Siwan ngana undanga, ita enandangge yawan yekap gwenu gwambok binga zikut.

²⁴Ziwan nanamu Mana ngang yania pewan kepdakane pimapa pake naking. Sike wa nakingu nanamu yekaune nana yaman naking.

²⁵Sike nanamu wa angelatane nanam yamukut. Anututa nanamu kwaapzang yaman napa takekan sikut.

²⁶Siwana masande ita tasiwan got taknga gunzitda akonggak katangga puyapbut. Siwan inane kekeknga aknganekan tasiwan got taknga amunzingga puyapbut.

²⁷Puyawawa itakan tasiwan kwait gwegwenu kwaapzang siknga waaminde banakan kepdane kupopong binga ba saisai yanggabam gwende kwaimune kaamang bingata pimaking.

²⁸Anututa kwaiu yot gapma banakan pewan epbing. Epuke sel yotna ayuking gwegwene yupbasiking.

²⁹Unzing kwaapzang siknga ge napan musia akgitnaking. Sike sanga wa Anutue sitawanggawan yamukut.

³⁰Sike waakwau undang atnayuking. Waaminda dua napan puyuwan

³¹Anututa musiptok natake aminu kekekngana kaya atzipan kumbing. Sike wa kumbingu wawi mateu Isrel nana take siknga tapaapata kumbing.

³²Anututa duya takngatui waaminde apasiwan kake ngana waiaknga kumzang tasike Anutue baniu dua siking.

³³Unzingge ita waaminu pasiwan sanga pasiking kakngata buyana dua aawan yutake kusika akumbing. Ngan, ita aminu waakwakge pasiwan asiknga gwauke yutake kusika kumbing.

³⁴Sike Anututa aminu kundu atzipan kumbing. Kupa kake dua kumbing aminu musia kapzang tapatekwamban ie apuke tumuk wamu kekeknga iniking.

³⁵Inike gatu anzing natdeking, Anutu nin ninduyuak kapanin. Anutu enane siknga yuak kapa nin gatanimunggaunin ngang natapbing.

³⁶Siwan ngana masande kem yake gatu geyangga ie yumdekan yaking.

³⁷Sike waaminda ie wamu dua gwaamuking. Dua tawake pasap wamu iat tasiking kaknga atzipbuking.

³⁸Siwan ngana Anututa musip kwikwik natayamuke waiakngana asandeyamukut. Sandeyamuke dua pasiwan maiking. Ita asinggan gatu gatu kaanga natapbut taknga ateke musiptok kaknga dua natayaman buyambam siknga dua sikut.

³⁹Itanu waaminde anzing natayamukut. Waakwau aminu gupnakan yuke akumnanga unin. Ngan, waakwau got takngata apuke kunggak binga.

⁴⁰Sike tapdukbamu sangana wena kepban komune yukingu yamandet tasike ie wamu gatu gatu ayamasandeking. Ayamasandeke tapduk bamu tasiwawa kake Anututa musiaatangu meyambam natapbut.

⁴¹Sike Isrel nana aminda tanzit taknga Anutue tasikingu dua teking. Anutu waapa kepi dundumna takngakan tawake tasinggak kapanin. Waaminda tanzit taknga ie tasiwawa musiaatangu meya natapbut.

⁴²Waaminda kekeknga buyambamu Anututa tasikut takngae dua natdeking. Tupa siknga tapduu ita iwanae kataune sandeke pakutde dua natapbing.

⁴³Sike tapduu waomune ita duya takngatu takngatu Soan kep komu, Isip kep komu yuwaune tasikut.

⁴⁴Anututa yangga tapan tekwamban tasiwan dak siwa Isipnana aminda tangopnanga dua sikut.

⁴⁵Gatu itakan ingut kat gwapbam pat kwaapzang siknga pewan waaminde kuking. Kuke ingutda ayasiwawan gwapbamda sanga puya naatang nana kwaapzang pasiwa maiking.

⁴⁶Siwan Anututa gatu gwakgwak kat apmak kat pewan apu sanga puyanaatang akopbingunin nayamuking.

⁴⁷Ita sopa zambum pewan epu wainu tapunu apasiwan maiking. Siwan aisda katau baap dakandaka pasiwan maiking.

⁴⁸Sike sopa zambumu buyambamda epuwawa yapasik sike ikwawa gamankat sipsipnaat atzipan kungwayamuking.

⁴⁹Ngan, ita kaanga kumzang siknga natayamuke waaminde meyambam yamukut. Yamuke angelana yanipewan kuku pasiwa meya buyambam paking.

⁵⁰Ita musiaatang toknga natayamuke waaminu dua kapekut. Aho. Ita maiu buyambam takngatu tewan apu zipan yumdekan kungwa takuking.

⁵¹Sike dongu Isip nanatane waaknga tupan tapaapa kuutgan zipan kumbing. Ngan, dongu Hamdane waaknga zipan kumbing.

⁵²Siwan ngana ita unzing sipsip kayuya apa dakngake tupan kuke aminabamu yanipake kuke kayukut. Sike keu sangana wena komune kukingu kepi ita yeuyamukut.

⁵³Waaminu yanipake kuwan take yuke dua gwauking. Siwan ngana yanggabam gwenu kaukaut yukutda apu iwana asusikwatapbut.

⁵⁴Ngan, ita yanipake pakapu keu inane komune pakapbut. Sike keu waomu ita kataknga kekeknga siakan tapata keu kekeknga akngananeta takut komune gatu apbing.

⁵⁵Keu waomune apuke dongu kundune nana ita yanikwasipewa kuwawa inane dongata pakapu yuking. Pakapu yuwana ita keu usanzike dongu Isrel nanae yamutakukut. Siwana yotna mitake une take yuking.

⁵⁶Siwan ngana masande Isrel nana aminda apmea aakingga Anutu enane siknga apae tanziyuuk ie yamandet tasike itane mama wamna dua tawaking.

⁵⁷Sike waakwakga yamandet siyuuk ie wamu sandeking. Unzing bapunata tupa tasiking taknga binga tasiking. Waakwau unzing kweem dakata gutonga siwan sakut daka song mumsa binga.

⁵⁸Waaminda alta gwenu anutu pupukngae kundu pasiwawa kake Anututa musiptok waaminde natayamukut. Ngan, anutu pupukngatane tuwanga pasiwawa kake Anutu musiaatangu wai natapbut.