SAM 74:1-16

¹Anutu, dasingge gata masa ninde nimukuyak? Ninu amindabamu gatane sipsip gwengwen binga ninduyak ngana gata kaanga asinggan natanimuya?

²Gata ninu amindabamde gatuka natanimuyo. Tupa siknga nindane bapuninu amindabamu gikae papi yuking. Gika dongu waakngane nana aminu gatayamuke iwande katakngane papi gikane dongga dakngake yuking. Sike dongu waakwakga tawanu Saion dakane yukingu tupa yukuyakge natapso.

³Sike nindane iwaninda apuke sangabamu you gatane buyambam gwene yuaingu gwa pasiwan maiking. Unzingge gika apu sanga wa maike yuaingge kayo.

⁴Gatane iwandata apu yotda gwa take yanggamatake tandotdonguke tasiking. Sike gatane sanga waaminda pake tangie inane sanga tuwanga kaya peking.

⁵Gatu katap sanu gikane yotda gwekatang yuaingu sandun pake kuku katap yapundu pasikaing binga unzing pasiking.

⁶Sike katap sanu tuwanga gatu kunzi kunzina kaya pasike peya waaminda apuke sandunda mateknga gatu hama buyambamu sanga kekeknga zipmapukaing gwegwenda ngangga zipmakapbing.

⁷Zipmakapmakenga gatane yotda gwekaa katapda satewan isikut. Katapda satewan isiwawa you take siknga gikae yutnangge yawi yukut gwen tasiwan wai siknga maikut.

⁸Sike waaminda musiaatangu ninu asiknga yaipakepnangge natapbing. Unzingge miti you kuupbamu ninde keune yuaingu sapewan yasiking.

⁹Sike tuwangu gata tupa ninde yeutnimukuyak ngana apmanu dua yeutnimi tuwangu wa binga dua kaamang. Siwan apmanu yakapsa aminu tapatu nikat dua yuamang. Unzingge nikat nana tapatuta meya wa kaamanggane tapduknga wena siwikgane dua nataak.

¹⁰Anutu, tapdukbamu yutnimu iwaninda sapdut wamu unzing ganikaning? Siwan wamu wai gae umandae asingganu unzing yakaning?

¹¹Dasingge gata gatanimunanga dua? Dasingge ga moo siknga yuke waaminu yake dua pasiwi maining?

¹²Siwan ngana Anutu, tupa siknga ga nindane King kapanin dakngake yukuyak. Siwan apman kaa ga nindane king kapa yuayak. Unzingge gata asinggan gatanimuke nin gatuka papi amak gwekatang meya dua pakamang.

¹³Sike gikane kekeknga akngane yanggabam gwenu wesiwi kaukaut paku yukumayak. Siwana gata Isip nana aminbamu pasiwi maiking. Pasiwi maikingu wa unzing pis buyambam siknga gwendu yanggabam gwene nana binga pasiwi maiking.

¹⁴Ngan, gata pukpuu buyambamu tapatane gwapaknga wesikuyak. Siwan gata itane gupnaapa kaap zongu saibumbum kwaimune yuaingge yami naking.

¹⁵Sike gata tasiwi yangga kepbanang katangga akoke zipmake kuking. Siwan yangga buyambam tapaapa gika pasiwi kuupbam atzakngaking.

¹⁶Gata kakaa akngaat gatu zikaa dakaat pasikuyak. Siwan gunzitkat gatu yekapat ngangu enane pekuyak.