Sam 44:3-23

³Melrmqgr lcng trnzaovxiolru enqmi rdrng mz toki r vea scdr x mz zmatq ngrdr esz'-krdr. A' leplz nemqng nzaovxiong mz zmatq ngrm, mz nzxplr-krm, x mz nzmnc-krbzme badr mz nzaodu-krm nidr.

⁴Gct, nim King rnge. Nim kx rngi-batrp nzaovxio-krgr, nigr neidu lr Jekop.

⁵Milxtxopekr enqmi rgrng mz nzxplr-krm. X rnzlvzokr kxnzatrkatilr nigr mz zmatq ngr drtqm.

⁶Murde trbrtiu drtwrnge popz' x toki r vea scnge Nzarlapx-krdr ninge mz nzotangr.

⁷A' ni-txpwzme kx arlapxle nigr mz enqmi rgrng, Mz nzamyati-krbzme drtqdr.

⁸Sa naglqlz-zvzkr nim. X nzawi-krbzkr bam tqvzpe tqvzpe.

⁹?A' memule drtqm tqsatrpe-ngrmle bagr, trokatrpe-ngrnqu ncblo ngr vea negrng? Mzli ka rlrtx-ngrpwzme mz enqmi rgrng nzamyati-krmlr drtqgr.

¹⁰X ngi-batrpeme nzdwasz-krgr nidr, X nztwz-krdr dztugrng amrlx.

¹¹X rlr-ngrbzme badr nznibq-krdr nigr mz nzapu-krgr sip, X nzvzmilr nigr mz drtc' nyzdrng mz nzwz-nrbalqtr-krbzkr badr.

¹²Apule kx amwabzme nigr badr mz narncbr kx topwzne, Mz nzapusr-krm nigr brmrda.

¹³Lr mrkzbleng kcng tzmnc-aepztrpqng bagr nznelvzlr nigr mz nzamyati-krmlr drtqgr, X nzxtrnga-ngrdr nigr.

¹⁴X neidu mz nrlc tulvzo nzobqszo-ngrdr nigr Mz nzyrpalelvz-krdr nigr.

¹⁵Aputr-zvzbo da kxtrka mz nzobqkr leplz lcng, X drtqnge mya zvz.

¹⁶Murde xlrx natq kxtrka kcng tzpimlr bange, X mcx nzmnc-krm enqmi rngeng.

¹⁷Kxmule-esz' nzprtzmqng bagr da lcng A' trmrbrtru mz drtwrgr nim x Nzesz'tikr Drtwrgu.

¹⁸Kxmule-esz' traxtxpekru nim, X o-zli-zvzkr nzti rm,

¹⁹A' katrpzme nigr mz mq enqmi rgrng mz nzrnzbrti-krdr nigr, mz nzapu-krdr kuli kzpetong. X nzaovxiolr nigr x kzdung nigr nzyrtzmqpeng mz gq.

²⁰Gct rgr, nzmu navecpx-lzbqmgr bam, Mz nzangio-krgr gct kzble,

²¹Tryc-kapqpwzu bam, Murde obqplxq nabzgr.

²²A' mz nzngini-krgr doa nemqng, vz zvz nznibqti-krdr nigr, Mz nzapusr-krdr nigr sip kcng tzmnc-nabung mz nzrnibqngr nidr.

²³Kxetu rgr, bzkq esablqme. ?Memule tro-lxlvr-ngrpwe'u bagr? Vz-anim, x bzkq pxtxpx-ngrn nigr.