Sam 42:1-8

¹Nabz ne nqvi lr Kora. Gct, nzmingrti-zlwzkr drtwrnge nim Apule animol kc drtwrde tqbrlxkz mqde lue.

²Nim Gct kc tqlu x nzsutikr drtwrnge nim apule nzbrlxkztikr drtwrnge lue kxbao. ?Myx mzli kx naxngi-ngrbo nzmnc-krme bange?

³Mz zbq kang kqlu yrni-zvzx x mnqtxpwo drlemzke' kx piz. A' enqmi rngeng nzyrpalelvzlr ninge, nzrpimlr kx, “?Memule Gct rm trokatrpe-ngrdeu nim? ?Bzpe?”

⁴Gct, mzli ka drtwrnge yrnibutx zlwz. A' dcpx mou mz drtwrnge mzli kc ena tqmailztr-ngrne leplz Mangr-nzangiongr nim. Mzli lcde abrtz-zlwzkr x ngr-katokr mz nzglqlz-krgr nim.

⁵Kxmule-esz' nabznge talvzo x nelznge vzdzm, A' sa na-abrtxtrpwo drtwrnge bam. Murde naglqlz-mou-ngrne nim kalr, Mzli kc na-arlapxq ninge.

⁶Gct rnge, mzli boipe trnzkrlzpe-krpou Israel. ?Memule tqpulio-zvz-ngrme bange nzkxpungr mz nzapu-krde lue kxvo? Nzvzdz-krm nelznge vz-ebirnrpe-ngrm bange apule nrc kcng tzyrplalvzolr ninge. X nztalvzokr nabznge xplr-zlwzpe apule nzyrpukr lue kxtalio mz nabzde. X ebio ngr srkau amrlx kcng tqatwzlr-ngrme nzalxlvrtine-zvzlr ninge. A' nadcpx mz drtwrnge da kcng tqmyalz tqaleq Israel, Mrkc tqyrlengr LueJodzn x tqycngr Newz Hemon x Newz Misa.

⁸Murde vz zvz nzpulio-krme nivz lrm mz zbq kang kqlu. X ngrbo bam mz nrlckxbq vzmi nzkrka'-krnge murde nim Gct kx rkam nzlungr bange.