Sam 25:3-19

³Clvebz doa kc tqabrtr-zvzbzle drtwrde bam, murde drtqde ma tzamyatibz. Clveti-lzbq zvz doa lc, a' mrlx kx ani txpwz nzota-krmu ncdr, mrlz nzmyakr drtqde.

⁴Da kx sutitx-zlwzbz drtwrnge bam, nzalvztr-krme bange nqmq krmqng amrlx. Delc nakrlz-zpwx-ngrne lrpzki rm.

⁵Elalvzx nzokatr-krme ninge mz nzvz-nqblq-krnge natqm. Eu. Murde nim Gct rnge kc tqarlapxle ninge, x tqabrkitr-zvzx drtwrnge nim.

⁶Gct, aelwapx-zvzm nzaodu-krm x nivz lrm bange. Gct, ale da lc, da kc tqwai-pnzq mzli kc bqnc.

⁷Ipq ninge mz alwx kcng tqalexng mzli kc tqngini-ngrne obla, murde nim mrlz-esz'ngr. Ipqpx nzvz-rbr-krngeng amrlx mz nzdcpxkr mz drtwrm nzaodu-zvz-krm.

⁸Jzs-zvzq leplz mz nzmncngr kxmrlz x kxtubq. Jzsiq mz nzalvztr-krm kxnzaleng alwx, murde nao-zlilr nzti rm.

⁹Kxrmailz, aelwapx-ngrbzme mz kxnzavzo-lzbqng da kxtubq. Kxakrlz, alvztr-zvz-ngrn nidr me pnz drtwrm.

¹⁰Lrpzki rmqng amrlx nzaelwapxbzlr mz leplz nemqng nzaodu-krm x nzangidati-krm natqm. Leplz lcng nzyrlq-zvzlr nzalvztr-krm x nzesz'tikr drtwrmu badr.

¹¹Ma-nqblq natqm kc tqesalz-ngrn mz nzipqpx-krm alwx rngeng, Murde nzkqlu-zlwzng.

¹²Nekeng nzlxngiti-angidrlr natqm, Nzo-zlilr lrpzki angidr mz nzalvztr-krm nidr.

¹³Olvz x ncblo lcng sa namnc-zpwxng. Oliqtibz drtc' kc tqpibzme, murde doa nedrng namnc-kzng elr.

¹⁴Pqtr mz drtwrm leplz kcng tzamrluelr nim. Pipx-zvzbzme da kx na-alelr mz nzvz-nqblq-krdr nzesz'tikr drtwrmu badr.

¹⁵Rtxtrpwo nibrnge bam mz nzmnc-xgle-krnge nim. Rlapx-zvzx mz nzokatr-krm ninge.

¹⁶Suti drtwrnge kx naobqme bange x nayc mz drtwrm ninge. Sutitx drtwrnge murde trpengr kztenge x trmnc-zpwxpewxu.

¹⁷Trte, katxpxbz nztalvzokr nabznge. Tekqtr drtwrm x arlapxbz ninge mz nzkxpu-krngeng.

¹⁸Vz zvz nzaotikr drtwrm nzkxpu-krnge x nzetqkr drtqnge, Vzm x ipqpxbz alwx rngeng.

¹⁹Wx-nzlongr nabznge nzkqlu-zlwzkr enqmi rngeng. Wzpx zlwz mz drtwrdr nzatrkati-krdr ninge.