Sam 18:18-48

¹⁸Nia ga nemen keneng at lumumuat, diga esep minia, ketla Leeme Silok ga lok see rak.

¹⁹Ni ga lok tooro ia basinge laniu, la ga lox asepsu ia atla ni ga lok momo minia.

²⁰Leeme Silok im taba ia mi luunun atla nia laradi manmanton la ni ik lox anarong ia atla nia laradi sepsen.

²¹Agara mumu asu Laulis Linga at Leeme Silok. A goxo raba sinta ne Moroa rak.

²²Agara mumu asu amisik leventaangas axap teren. Nia goxo ronga xepe at levempapaase ali ren.

²³Iklen i do kopmen tibilinga rak, la aga lok tatao avukar axa ia la nia goxo lok taxakapmek.

²⁴Kuren la im taba ia mi luunun atla nia aga lok mun leveloklok manmanton la iklen i do nenia laradi sepsen.

²⁵O Leeme Silok, nenu u ruturun tinedi di ruturun saparav u. La uk lox avukat tinotno rinedi din manton tino.

²⁶La uk lok lempanga i dadat tinedi loklok atdi i dadat. Ketla do tentaba dik lok laxakapmek, nenu u lok ngan laradi munepen midi.

²⁷Uk lox asepsu nedi di lox asi di ukopok, la uk lox asi nedi dim simi aurut di.

²⁸O Leeme Silok, um taba ia mi laxasep, la uk lok kepe ia basinge loklok at lamain.

²⁹Um taba box ia mi lolos ti vesep mi limixin munepen minia, la lolos tip sev asi di.

³⁰Na ne Moroa, loklok teren in manton tino. Dola ni na xaape mi tavanga, ni naba lox i. La neni Lenban tinedi di vot pasa i xusu na lok see atdi.

³¹Leeme Silok, neni xusuk ne Moroa. Moroa xusuk i lok ngan Lentupe ridik.

³²Neni mun ne Moroa ik lox alolos ia, la neni mun ik lok tatao lavatpas tarak.

³³Neni mun i su auru ia at lavatpas tarak ngan lavanga mi lavanuet kangkedek it pas matmatkun. Ik lok tatao box ia rovana at lempatkaana.

³⁴Ik lox ase ia ri vesep, kusu anaba soso avukat mi lososo lolos.

³⁵O Leeme Silok, uk lok see rak la uk lox asepsu ia. Loklok tooro ram ira lox asilok pam ia, la lolos bok taram ga kubak pe ia basinge limixin munepen minia.

³⁶Ugak lok tatao avukar ia basinge di la di goxo xoxo ka ia. La nia goxo subu bok.

³⁷Nia ga xala limixin munepen la aga rebeng alis kaka di. Nia goxo lok mamas se aga sev amet axap di.

³⁸Aga bobo amet di, la digoxo epovo na xatu kaxar amlong. Digak midi etaba ro melamgo rak.

³⁹Uga raba ia mi lolos ti nom leesep, la nia aga sak tup mi limixin diga munepen minia.

⁴⁰Uga lox aoo limixin munepen minia la diga sixiro rak. Agap sep kakapmek tino nedi diga belengatngas tia.

⁴¹Digang teng ti loklok tooro, ketla tara goxo lox asepsu di. Diga toro ri Leeme Silok, ketla ni goxo ronga res atdi.

⁴²Aga long povorok tino di la di lok ngan ta lakbus kao no lamanman it mas kepe i. Aga vas asi di, ngan ta at pas at lapke ro at langas.

⁴³Uga lox asepsu ia basinge limixin tongtonga xepe la uga lox asilox ia ngan loorong at levenabung mixin axap. Limixin nia goxoklen di, nanga nia am gomgonga di.

⁴⁴Limixin boro xadiong dit kis tintiding mi levempatgulom atnedi saparav ia. Dola di ronga ia, di ronga res at levelinga rak.

⁴⁵Dixo abelemes bok ba, la di dede aleng, mo do di on basinge laraogu matmatkun atdi.

⁴⁶Leeme Silok ni Luntoo Avolo rak. A emi asu min, ni Lentupe ria. Ana tong asu i ri limixin do ne Moroa i silok aleng la ik lox asepsu ia basinge limixin munepen minia.

⁴⁷Im taba ia mi lolos ti sak tup mi limixin munepen minia, la i tupe ia at limixin kapmek. La neni mun ik lox asi at larabung mixin axap kusu diba nemen maxopok tarak,

⁴⁸la ik lox asepsu ia basinge limixin munepen minia. O Leeme Silok, u raba vam ia mi lolos kusu ti sak tup mi limixin munepen minia, la u lok see rak kusu limixin sepsep di noxo sev asi ia.