4Aho, na dua yuwa takawan dapunu pewit. Wena siknga.
5Tupanu you gwendu Buyambam tapata une yuwik gwende gambok tawake kawit. Anutu kekeknga Isrel nana apa paku undang yuwik. Siwan na masan yuwa takawik.”
6Sike ninu Epratah yot gapmane yuke pukit takwanu buyambam tapatane gwende natapbumang. Sike ninda kawatna Jardane kep komune yuwawan kakumang komune yukut.
7Ninda Buyambam tapatane you buyambam gwene kuna. Ninda wesim kuke ayuak komune munu puke gwetake gaau inina, ngang yawa natapbumang.
8Buyambam tapa, ga enake apuke keu yuwi takananga komune pukuyuyo. Sike gatane pukit takwanu gikane kekekngaka undang yuau une yuke apso.
9Nata natapa gata pris gikane apaapata tauknga pasike nomanu asinggan asinggan tasiningge nataat. Nomanu waaknga unzing, tauk take pasikaing binga. Sike gikane aminbamda yanggamatake baknganingge nataat.
10Buyambam tapa, gata Devit tapi tupan amin tapaka dakngakut. Siwan gikane puya amindae natake masa ma imim.
11Buyambam tapata tupa wamu kekeknga takngatu Devitde yawan kekekakuu dua sandewik. Siwan wamu anzing yakut, “Nata tasiwa gatane dongune nana tapatuta king dakngawik. Kingu waapata gae tangge yuwik,” ngang yakut.
12“Sike gatane waakga akwau nata yawa kekekakut taknga tawake gatu mama wamu nata yamukum taknga tawambanu, itane waaknga masan aatning kaya king daknganing. Ina unzakan masan kaya unzakan siwik,” ngang yawan kekekakut.
13Dasingge, Buyambam tapata Saionu natane yotbam gapmana ngangu gwa yawan yukut. Unzingge ita waomune asinggan yutnangge nataak.
14Ita anzing yakut, “Na yotbam anggapmane asinggan asinggan yuwit. Nata you anggapma king kapa yuwitde gwa yakum,” ngang yakut.
15Sike nata sanga kwaapzang you Saion gapmane nanae yama waakwau sangae dua dapning. Ngan, nanamu kundu atdapmakaingge yama akgitnawan yutning.
16Siwan nata pris Sion yuaing aminde puya yama aminbamu gatuna apanggat takngae aminbam yanikapning. Siwana natane aminabamu wanggapmane nana apbakngake kap taining.
17Nata Devitdane dongune nana tapatu tapa ita kingu you wa gapmane dakngake yuak. Siwan itane dongu puya aakngae tangge songa dua siwik.
18Siwan nata tasiwa itane iwana maaknga siknga natapning. Siwan ngana ita king kapa yuke kekekanggak kakngata buyambam siknga siwik.