SALMOS 79:3-6

³Quena, tocualancaitacahua quintzontlamiltijque nochi nopa tlacame ipan altepetl Jerusalén. Huan inieso tlen toyajqui temoc queja se atemitl, huan ax mocajqui niyon se para quintlalpachos.

⁴Huan ama nochi tlaltini tlen techyahualojtoque techpinajtíaj huan techhuetzquilíaj.

⁵Toteco Dios, ¿hasta quema tlamis ticualantos ica tojuanti? ¿Huelis para nochipa mocualancayo eltos queja tlitl?

⁶Xijtitlani mohueyi cualancayo ipan nopa tlaltini campa ax mitzixmatij, huan ipan altepetini campa axaca mitzhueyimati, pero amo xijtitlani ipan tojuanti.