SALMOS 78:6-41

⁶huan iniixhuihua tlen tlacatise teipa. Huan queja nopa nochi tlacame quinixmatise itlanahuatilhua Toteco.

⁷Yeca hasta ama miyac tlacame quintlepanitaj itlanahuatilhua Toteco Dios, huan motemachíaj ipan ya para quinmocuitlahuis. Huan ma ax quiilcahuaca nochi nopa huejhueyi tlamantli tlen quichijtoc Toteco. Monequi ma quintoquilijtinemica nochi itlanahuatilhua.

⁸Pampa ax quinamiqui para elise queja ininhuejcapan tatahua tlen moyoltetilijque huan ax tlatlepanitaque. Inijuanti ax elque temachme ica Toteco Dios, niyon ax quimactilijque ininyolo, niyon ininyolis.

⁹Nopa tlacame tlen tlali Efraín mocuepatoj huan cholojque ipan nopa tonali quema yahuiyayaj tlatehuitij. Quena, cholojque yonque quipiyayayaj miyac tepostli para tlatehuise.

¹⁰Ax quintlepanitaque itlanahuatilhua Toteco Dios, huan ax quinejque nejnemise ipan iojhui.

¹¹Quiilcajque nochi tlamantli tlen yajaya hueli quichihua. Ax quiilnamijque nopa yejyectzi chicahualnescayotl tlen quichijqui Toteco.

¹²Quena, Toteco Dios quichijqui miyac tlamantli iniixpa ininhuejcapan tatahua ipan tlali Egipto campa itoca Zoán.

¹³Quitlajcoxelo nopa hueyi atl huan quichijqui ma panoca. Ipan nochi ome lados nopa atl moquetzqui queja tepamitl.

¹⁴Ica tonaya quinyacanqui ica se mixtli para quinecahuilis, huan ica tlayohua ica se mixtli tlen tlahuiyaya queja tlitl.

¹⁵Ipan huactoc tlali quitlapo nopa hueyi tetl huan quisqui miyac atl para atlique hasta aixhuique.

¹⁶¡Quena, ipan tetl quisqui miyac atl tlen motlalo queja se atemitl!

¹⁷Pero inijuanti quisenhuiquilijque ax quitlepanitaque. Huan nepa campa huactoc tlali tlajtlacolchijque ica Toteco Tlen Más Hueyi.

¹⁸Pampa quiyejyecojque Toteco Dios huan quitlajtlanijque tlacualistli tlen ininyolo quinequiyaya.

¹⁹Hasta cualanque ica Toteco huan quiijtojque: “¿Toteco Dios huelis techtlamacas ipan ni huactoc tlali?

²⁰Xiquitaca, Toteco Dios quitlapo nopa hueyi tetl huan quisqui miyac atl queja eltosquía se atemitl hasta atzonpolijqui tlali, pero ¿nojquiya huelis techmacas tlacualistli? ¿Huelis techtlamacas tiitlacajhua ica nacatl?”

²¹Huan quema TOTECO quicajqui ni tlamantli, tlahuel cualanqui. Huan ipan icualancayo quisqui tlitl ica israelitame, inijuanti tlen iixhuihua Israel,

²²pampa inijuanti ax quineltocaque Toteco Dios, niyon ax motemachijque ipan ya para quipiya chicahualistli para quinmaquixtis.

²³Pero yonque queja nopa quichijque, Toteco Dios quinahuati nopa mixtli huan quitlapo elhuicactli.

²⁴Huan quichijqui ma huetzi nopa tlacualistli tlen itoca maná para ma quicuaca queja quema huetzi atl. Quinmacac tlacualistli tlen hualajqui tlen elhuicac.

²⁵Tlacame quicuajque tlen elqui inintlacualis ielhuicac ejcahua Toteco. Quena, quintlamacac hasta cuali ixhuique huan hasta mocajqui nopa tlacualistli.

²⁶Ica ihueyi chicahualis quihualicac nopa ajacatl tlen huala campa quisa tonati huan tlen huala ica sur para ma tlaajaca campa elhuicactli.

²⁷Quichijqui ma hualaca miyac totome queja imiyaca tlaltejpoctli. Quena, hualajque totome queja mixtli huan queja imiyaca xali tlen onca iteno atemitl.

²⁸Huan Toteco quichijqui para nopa totome ma huetzica tlatlajco campa quichijtoyaj ininyoyoncal.

²⁹Huan nopa tlacame tlacuajque hasta ixhuique. Toteco quinmacac nacatl queja ininyolo quinequiyaya.

³⁰Pero quema sanoc tlantoyaj tlacuaj, huan hasta noja quipixtoyaj nacatl ipan inincamac,

³¹Toteco Dios motlalanqui ica ihueyi cualancayo, huan quintzontlamilti nochi nopa telpocame tlen más tlapejpenilme ipan tlali Israel.

³²Pero yonque Toteco quinchihuili ya nopa, nopa tlacame quisenhuiquilijque tlajtlacolchijque, huan ax quineltocaque nopa huejhueyi chicahualnescayotl tlen yajaya quichijqui iniixpa.

³³Yeca Toteco quintlaijiyohuilti ipan nochi ininyolis huan quintzontlamilti san ica se tlalochtli.

³⁴Pero teipa, quema ya quintzontlamiltijtoya sequin, huajca quena, ne sequinoc quitemojque Toteco Dios. ¡Quena, nimantzi mocuepque huan quitoquilijque!

³⁵Huan quiilnamijque para yajaya Toteco Dios tlen quinmocuitlahuiyaya para ax quinajsis tlen ax cuali. Huan quiilnamijque para Toteco Tlen Más Hueyi san yajaya inintemaquixtijca.

³⁶Pero nopa israelitame ax quitoquiliyayaj ica nochi ininyolo. ¡Axtle! Quitoquiliyayaj san ica inincamac.

³⁷Pampa ininyolo eltoya huejca tlen Toteco. Huan ax quichihuayayaj tlen quitlajtolcahuilijtoyaj Toteco para quichihuase.

³⁸Pero Toteco quipixqui hueyi iyolo ica inijuanti. Quintlapojpolhuiyaya inintlajtlacolhua huan ax quintzontlamiltiyaya. Miyac huelta quiquetzqui icualancayo para ax quintlatzacuiltis.

³⁹Pampa Toteco quiilnamijqui para inijuanti san elque tlacame tlen ininyolis ixpolihui san ica se tlalochtli, huan ax quema mocuepasquíaj sampa.

⁴⁰Nepa ipan huactoc tlali, tlahuel miyac huelta ax tlatlepanitaque ica Toteco Dios huan quiyolcocojque.

⁴¹Ajachica quiyejyecojque, huan ica ya nopa mochihuilijque para Toteco ma quintzontlamilti. Niyon ax quicahuilijque para Toteco ma quintiochihua, yajaya tlen ininDios israelitame huan tlen Tlatzejtzeloltic.