SALMOS 22:13-23

¹³Nanalcaj queja tecuanime tlen mosisiníaj. Camachalohuaj huan nechmelactlachilíaj.

¹⁴Na nimomati queja atl tlen mopatzcatoc huan campa hueli toyajtoc. Nochi noomiyo san lelecuecatoc. Noyolo eltoc queja cera tlen atiya.

¹⁵Tlantoc nochi nochicahualis. Nijpiya nocamac huactoc queja se chachapal tepalcatl, huan nonenepil tlatzquitoc ica nocamacholec. Tinechtlalijtoc campa tlahuactoc huan campa onca miquistli.

¹⁶Tlacame tlen ax cuajcualme nechyahualojtoque queja chichime. Quicocoyotztoque noma huan noicxihua.

¹⁷Hasta huelis nijpohuas noomiyohua, pampa sesen nechcocohua. Nocualancaitacahua nechsentlachilijtoque huan san noca paquij.

¹⁸Momajmacaj tlen nimoquentiyaya. Quena, mahuiltíaj ica piltetzitzi para quiitase ajqueya quitocaros sesen noyoyohua.

¹⁹Pero ta, TOTECO, amo xinechtlalcahui, pampa na niitztoc momaco. Xihuala nimantzi xinechpalehuiqui.

²⁰Xinechmanahui tlen ininmachete ni mosisinijca tlacame tlen itztoque queja chichime. Amo xiquincahuili ma nechmictica.

²¹Eltoc queja niitztoc inincamaco tecuanime, huajca xinechmaquixti. Nopa tlacame itztoque queja torojme, ma ax nechtompojhuica.

²²Huan na niquinpohuilis noicnihua tlen ta, TOTECO, huan quema oncas tlasentilistli, nimitzhueyichihuas iniixpa nochi tlacame.

²³TOTECO, tojuanti tlen timitztlepanitaj huan tiquimacasij timitzixpanose timitzpaquilismacaj. Nochi tiiteipa ixhuihua Israel, timitzhueyichihuaj. Quena, timitzhueyimatij nochi tiisraelitame.