Salmos 144:1-13

¹David isquirbishan alabansa. Alabasha cachun imapitapis chapämaj Tayta Diosga. Paymi nogataga yachachiman camaricachiman guërracho pillyanäpäpis.

²Paymi cuyaman, chapäman. Paymi mas altunnin pacacunä, imapitapis jorgamaj. Paymi chapacuna escüdö. Paymi llapan runacunatapis munaynëman churamun.

³Tayta Dios, ¿imaraj runaga paypaj yarpachacunayquipäga? ¿Imaraj runaga fiyupa cuyanayquipäga?

⁴Runaga juc jämayta cachaycuynöllami. Llantuy päsajnöllami aywacuycanpis.

⁵Tayta Dios syëluta chaparaycajta auchirir urämuy. Puntacunata yataycuy goshtay jatarinanpaj.

⁶Achicyaypa achicyar räyuchimuy. Chaywan chiquishojcunaga machiypa-machirmi gueshpenga.

⁷Janajpita-pacha ayparcamuy ari. Jatun lamarpita maquiquiwan jorgaycamay ari. Mana rejsishä jäpa runacunapita salbaycamay.

⁸Chay runacunaga llullacuyllatami rimanpis. Manacajpita jurashpan derëchu caj maquintapis jogarin.

⁹Tayta Dios, mushoj alabansawanmi alabashayqui. Gamta alabashpä cantashaj chunca cuerdayoj arpata tucapallapa.

¹⁰Gammi camacächinqui raycuna jucta binsinanpaj. Sirbishojniqui Davidtapis Gammi salbarayqui sabliwan wañunanpita.

¹¹Mana rejsishä jäpa runacunapita salbaycamay ari. Chay runacunaga llullallatami parlanpis. Llullacur manacajpita jurashpan derëchu caj maquintapis jogarin.

¹²Wamräcuna wiñaycuchun wertacho caj lantacuna wiñajnöraj. Warmi wamräcunapis caycuchun cuyayllapaj pilancu palasyuta camarächejno.

¹³Micuy churacunäcunachöpis llapan casta micuy juntasha caycuchun. Uywäcunapis jircacho waranganpa waranganpa miraycuchun.