SALMOS 143:4-10

⁴Nelía senquistoc nimoyolcuesohua, hasta ayoc nijmati tlachque nijchihuas.

⁵Niquilnamiqui quejatza eltoya ipan nopa tonali tlen panoc. Nimoyolilhuía tlen nochi huejhueyi tlamantli tlen tijchijqui.

⁶Yeca nimomatlalana moixtla huan nimitztemohua. Ipan noyolo tlahuel nimitznequi queja se tlali tlen huactoc quinequi atl.

⁷TOTECO, nimantzi xinechnanquili pampa tlahuel nitlaijiyohuía ipan noyolo. Amo ximoicancuepa tlen na para ax nimiquis.

⁸Ica ijnaloc, xinechnextili moteicnelijcayo, pampa ipan ta nimotemachijtoc para tinechmocuitlahuis. Xinechnextili nopa ojtli tlen monequi nijtoquilis, pampa san ta nimitzilhuía tlen eltoc ipan noyolo.

⁹TOTECO, xinechmanahui tlen nocualancaitacahua, pampa ipan ta nimotemachía para ax tleno nopantis.

¹⁰Xinechmachti ma nijchihua tlen ta tijnequi pampa ta tinoTeco Dios. MoTonaltzi ma nechyacana campa cuali nopa ojtli.