Salmos 119:36-89

³⁶Estatutuyqui nishallanta ruranäpaj yarpächimay. Ama camacächiychu suwacullar rïcuyänäpäga.

³⁷Ama cachamaychu manacajcunallaman ricaränätaga. Cawachimay ari gam munashayquino caminullayquipa purinäpaj.

³⁸Sirbishojcunataga allilla goyächinayquipämi aunirayqui. Nogatapis allilla goyächimänayquipaj aunimay ari.

³⁹Ama camacächiychu manchacushä pengayman chayanätaga. Gam jusgashayquicunaga llapanpis allimi.

⁴⁰Nogaga mandamintuyquicunata sumaj yachacuytami munä. Cawachimayraj ari. Gamga alli juezmi canqui.

⁴¹Tayta Dios aunimashayquino musyachimay cuyacoj, salbacoj cashayquita.

⁴²Chaynöpami achäquita ashipämajcunataga cutichishaj. Gampa palabrayquimanmi yäracö.

⁴³Ama gongaycachimaychu rasun cajta parlanäpaj caycajtaga. Gam jusganayquipaj cajllamanmi nogaga yarparaycä.

⁴⁴Imaycamapis yachachimashayquicunallatami cumliyta munaycä.

⁴⁵Chayrämi goyäshaj mana yarpachacuypa. Nogaga willapämashayquicunatami cumlishcä.

⁴⁶Estatutuyquicuna imano niycashantapis raycunapa ñaupanchömi willacushaj. Mana pengacuypami willacushaj.

⁴⁷Nogaga mandamintuyquicunata cushicurmi cumlë. Chaycunata cumlirmi fiyupa cushicö.

⁴⁸Nogaga cushishami mandamintuyquitapis chasquicö. Layniquicunatapis manami gongächu.

⁴⁹Nogata nimashayquicunataga yarpaycuy. Nogaga palabrayquimanmi yäracuycä.

⁵⁰Llaquicuycho caycashä örapis aunimashayquimi cushicachiman.

⁵¹Mana rispitacojcunami mana jamaypa achäquita ashipaycäman. Nogami ichanga yachachimashayquicunata mana gongächu.

⁵²Ñaupata jusgashayquicunatami yarpaycä. Chaycunami shacyächiman.

⁵³Yachachicuyniquita cachaycoj fiyu runacunaga fiyupami rabyachiman.

⁵⁴Cay pachachöga gorpallami tiyä. Layniquicuna alli cashantami willacushaj.

⁵⁵Tayta Dios, chacaycunapis gamtami yarpä. Yachachishayquicunatami cumliyta munä.

⁵⁶Willapämashayquicunataga wiyacuycämi.

⁵⁷Tayta Dios, gamllamanmi yäracaycämö. Palabrayqui imanöpis nishanta cumlinäpämi aunishcä.

⁵⁸Llapan shongöpami gam munashayquino goyashcä. Aunimashayquino alli ricamay ari.

⁵⁹Imanöpis cawashätami yarpachacushcä. Chaymi estatutuyqui nishancunatana wiyacushaj.

⁶⁰Jucllami cumlishcä mandamintuyquicunataga.

⁶¹Fiyucunaga tucuy-jinanpami achäquita ashipämasha. Chaypis manami gongashcächu yachachicuyniquitaga.

⁶²Pullan pagas jatarcurmi gamtaga mañacö alli jusgacoj cashayquipita.

⁶³Nogaga allimi ricanacö gamta rispitashojcunawan, willapashayquita cumlejcunawan.

⁶⁴Tayta Dios, cay pachachöga llapantami cuyanqui. Layniquicunatapis masta yachaycachimay ari.

⁶⁵Tayta Dios, palabrayquicho niycashannömi nogataga alli ricamashcanqui.

⁶⁶Alli fisyuyoj, yarpaysapa canäpaj yarpayta goycamay. Nogaga yäracö mandamintuyquicunamanmi.

⁶⁷Manaraj mandamintuyquicunata wiyacushäcamaga achcatami llutancunata rurarä. Cananmi ichanga palabrayquicho nishannöna cumliycä.

⁶⁸Gamga allimi canqui. Allitami ruranqui. Layniquicunata yachaycachimay.

⁶⁹Mana rispitashojcunaga mana cajtami jitapäman. Chaypis nogaga llapan shongöpami willapämashayquicunata cumlë.

⁷⁰Mana rispitashojcunaga llutallantami yarpanpis. Nogami ichanga cushicö yachachicuyniqui nishanta cumlir.

⁷¹Nogapäga allimi casha pengayman churamashan. Chaynöparämi layniquicunata yachacushcä.

⁷²Nogapäga waranganpa guellaypitapis goripitapis mas allimi gam yachachimashayquega.

⁷³Quiquiquimi ruramashpayqui formacächimarayqui. Yarpayta goycamay ari mandamintuyquicunata yachacunäpaj.

⁷⁴Gamta rispitashojcunaga ricamashpan cushicongami. Nogaga palabrayqui niycashanmanmi yäracö.

⁷⁵Tayta Dios, nogaga musyämi llapanpita alli jusgaj cashayquita. Quiquë imatapis rurashäpitami ñacachimanquipis.

⁷⁶Cuyacoj cayniqui nogataga cushicachimächun aunimashayquino.

⁷⁷Cuyapäcoj cashayquita musyachimänayquipaj cawachimay. Nogaga yachachicuyniquita cumlirmi cushicö.

⁷⁸Mana rispitacojcunaga pengaycho cachun. Paycunaga jitapämallarmi ñacaycächiman. Nogami ichanga willapämashayquicunallata yarparäcushaj.

⁷⁹Gamta rispitashojcunaga, estatutuyquita cumlejcunaga nogawan shuntacächun.

⁸⁰Gampa layniqui niycashallanman shongöpis yarpächun. Chaynöpami imapitapis mana pengacushächu.

⁸¹Salbamänayquitami pasaypa shuyaraycä. Palabrayquimanmi yäracuycä.

⁸²Gam aunimashayquita ricchacuycaptillämi ñawëpis chulluycan. Chaymi «¿imayraj shamunqui shacyächimänayquipaj?» në.

⁸³Llapan gongashana auquinna cashpäpis, gampa layniquicunataga manami gongärächu.

⁸⁴¿Imaycamaraj awantashaj? ¿Imayraj jusganqui gaticachämajcunataga?

⁸⁵Mana rispitashojcunami y yachachicuyniquitapis mana wiyacoj runacunami mana alliman chayanäta munaycan.

⁸⁶Yanapaycamay ari. Imatapis mana rimapaycaptëmi gaticacharcaycäman. Gampa mandamintuyquega llapanpis rasun cajllami.

⁸⁷Ichicllapami pishisha wañunäpis. Chayno caycarpis manami gongaycushcächu willapämashayquicunata cumliytaga.

⁸⁸Cuyacoj cashayquimanno masta cawachimay ari. Chaura estatutuyquicunatapis cumlishämi.

⁸⁹Tayta Dios, palabrayquega mana gongacajmi. Syëluno mana ushacajmi caycan.