SALAMO 72:14-20

¹⁴Bema unai ogogami taudia, be haida ese idia dagedage henia neganai, king ese unai ogogami taudia do ia hamauria. Ia ese edia mauri do ia naria namonamo noho, badina edia mauri be gau namo herea ia dekenai.

¹⁵King ena mauri do ia daudau be namo! Sieba ena golo be king dekenai idia henia be namo. Namona be iena bese taudia ese, king dainai Dirava do idia noia, vadaeni Dirava ese king do ia durua, bona do ia hanamoa, nega ibounai.

¹⁶Namona be koni momo herea, be tano dekenai do ia vara namonamo. Namona be ororo gabudia danu dekenai, uiti bona aniani avadia do idia tubu namonamo, Lebanona dekenai idia tubu namonamo bamona. Namona be hanua ibounai dekenai taunimanima momo do idia noho, uma tano dekenai rei momo idia noho bamona.

¹⁷Lau ura king ena ladana do idia laloaboio lasi. Lau ura iena sivarai be do ia noho daudau, dina do ia noho daudau bamona. Ia dainai bese idauidau ibounai ese hanamoa do idia davaria, bona idia ese Dirava do idia noia, ia ese idia do ia hanamoa, king ia hanamoa hegeregerena.

¹⁸Lohiabada, Israela ena Dirava, do ita hanamoa. Ia sibona ese hoa karadia ia karaia noho.

¹⁹Lohiabada ena ladana namo herea do ita hanamoa hanaihanai. Iena hairai namona ese tanobada ibounai do ia hahonua. Amen bona Amen.

²⁰Davida Iese ena guriguri be iniseni ia doko.