SALAMO 119:57-111

⁵⁷Lohiabada e, oi sibona lau ura henia noho. Lau ese lau gwauhamata vadaeni, oiemu taravatu do lau kamonai henia.

⁵⁸Mai egu kudouna ibounai danu oi dekenai lau noinoi inai, lau do oi hanamoa. Lau do oi bogahisihisi henia, oiemu gwauhamata hegeregerena.

⁵⁹Lau ese egu mauri ena dala lau tahua, bona lau laloa momo vadaeni, bona unai negadia ibounai, oiemu hadibaia hereva dekenai lau giroa lou.

⁶⁰Lau naria kava lasi, to karaharaga oiemu oda hereva lau kamonai henia.

⁶¹Kara dika taudia ese lau idia veria toho, edia kara be lau danu do lau karaia totona. To lau ese oiemu taravatu lau laloaboio lasi.

⁶²Hanuaboi momokani neganai lau toreisi noho, oi do lau hanamoa totona, badina oi ese kota hereva maoromaoro oi gwauraia noho.

⁶³Oi dekenai idia gari taudia, bona oiemu taravatu idia badinaia taudia ibounai be egu turana taudia.

⁶⁴Lohiabada e, tanobada be oiemu noho hanaihanai lalokauna dekenai ia honu noho. Oiemu taravatu lau dekenai mani do oi hadibaia.

⁶⁵Lohiabada e, lau, oiemu hesiai tauna dekenai kara namo oi karaia vadaeni. Oi ese oiemu gwauhamata oi hamomokania vadaeni.

⁶⁶Aonega bona lalona kehoa be lau dekenai do oi hadibaia, badina be oiemu taravatu lau abidadama henia noho.

⁶⁷Matakani ena hisihisi lau do abia lasi neganai, lau ese oiemu dala dekena amo lau raka siri, to harihari oiemu hereva lau kamonai henia noho.

⁶⁸Oi be namo, bona oiemu kara danu be namo. Oiemu taravatu mani lau dekenai do oi hadibaia.

⁶⁹Hekokoroku taudia ese, hereva koikoi dekena amo lau idia hadikaia noho, to lau ese oiemu hadibaia hereva lau kamonai henia, mai egu kudouna ibounai danu.

⁷⁰Inai taudia edia kudoudia be auka, bona mai edia lalona kehoa lasi, to lau ese oiemu taravatu lau moalelaia noho.

⁷¹Oiemu matakani ena hisihisi lau abia, be lau dekenai ia namo bada, badina be unai matakani dainai oiemu taravatu lau tahua, bona ena namo lau davaria.

⁷²Oiemu uduna hereva ena taravatu be namo herea lau dekenai. Golo bona siliva momo herea, be oiemu taravatu ese ia hereaia momokani.

⁷³Lohiabada e, oiemu imana ese lau idia karaia, bona oi ese lau oi naria noho. Mani emu kara lalona kehoa lau dekenai do oi henia, vadaeni oiemu taravatu edia anina do lau davaria.

⁷⁴Vadaeni oi dekenai idia gari noho taudia ese, lau idia itaia neganai do idia moale, badina be oiemu hereva lau abidadama henia noho momokani.

⁷⁵Lohiabada e, lau diba oiemu taravatu be maoromaoro. Bona lau diba oi ura lau do oi hamaoromaoroa dainai, oi ese matakani ena hisihisi lau dekenai oi siaia, badina oiemu taudia oi naria kara, be mai maoromaoro, bona momokani danu, bona nega ibounai oiemu kara be idau lasi.

⁷⁶Mani emu kara oiemu noho hanaihanai lalokauna dekena amo, lau do oi hagoadaia, badina be lau, oiemu hesiai tauna dekenai, oi ese unai bamona oi gwauhamata vadaeni.

⁷⁷Lau dekenai oiemu bogahisihisi do oi henia, vadaeni do lau mauri noho, badina be oiemu taravatu dekenai lau moale noho.

⁷⁸Hekokoroku taudia ese lau idia samania koikoi noho. Mani emu kara oi ese idia do oi koua, vadaeni do idia hemarai momokani. To lau ese oiemu hadibaia hereva do lau laloa noho.

⁷⁹Dirava dekenai idia gari, bona oiemu taravatu ena anina idia diba taudia, be mani lau dekenai do idia mai.

⁸⁰Lohiabada e, mani emu kara lau do oi durua, oiemu taravatu do lau naria namonamo momokani, kerere ta lasi, vadaeni hemarai be do lau abia diba lasi.

⁸¹Lohiabada e, egu lauma ese oiemu hamauria ia ura henia bada herea noho, bona egu goada be ia ore momokani. To lau ese oiemu hereva lau abidadama henia noho.

⁸²Oiemu gwauhamata lau naria noho dainai, egu matana idia manoka lao noho, bona lau tai noho, lau gwau, “Edena negai oi ese lau do oi durua?”

⁸³Lau be dika vadaeni, uaina udaia nanigosi kopina, ia makohia dainai idia negea ore gauna bamona, to lau ese oiemu taravatu lau laloaboio lasi.

⁸⁴Lohiabada e, lau, oiemu hesiai tauna, be do lau naria noho ela bona edena negai? Edena negai lau idia dagedage henia taudia edia dika davana, be do oi henia?

⁸⁵Hekokoroku taudia, oiemu taravatu idia kamonai henia lasi taudia, ese hunia dekenai lau hadikaia totona dalana idia karaia noho.

⁸⁶Lohiabada e, oiemu taravatu ibounai be ai abidadama henia diba. Mani lau do oi durua, badina tau haida ese, lau hadikaia totona hereva koikoi idia gwauraia noho.

⁸⁷Idia ese kahirakahira lau idia alaia, to lau ese oiemu taravatu lau rakatania lasi.

⁸⁸Oiemu noho hanaihanai lalokauna dainai, mani lau do oi naria namonamo. Unai neganai lau ese oiemu taravatu do lau kamonai henia.

⁸⁹Lohiabada e, oiemu hereva be do ia noho ela bona hanaihanai. Ia be guba dekenai ia gini goada noho.

⁹⁰Oiemu hereva be mai maoromaoro bona momokani danu oi badinaia, bona do oi badinaia noho ela bona hanaihanai. Oi ese tanobada oi karaia, bona ia gini goada noho.

⁹¹Oi sibona oi hereva, vadaeni gau ibounai idia noho, ia mai bona hari danu, badina be gau ibounai bona taunimanima ibounai ese, oiemu gaukara idia karaia noho.

⁹²Bema oiemu taravatu lau moalelaia lasi neganai, egu hisihisi ese lau do ia hamasea momokani.

⁹³Lau ese oiemu taravatu do lau rakatania lasi, badina idia dekena amo oi ese lau oi hamauria.

⁹⁴Lohiabada e, lau be oiemu, mani lau do oi hamauria, badina lau ese oiemu hadibaia hereva lau tahua namonamo vadaeni.

⁹⁵Kara dika taudia be hunia dekenai lau idia naria noho, lau do idia alaia gwauraia, to lau ese oiemu oda hereva lau laloa noho.

⁹⁶Lau be hari lau diba, tanobada dekenai ia noho gauna ta, be ia namo momokani diba lasi, to oiemu taravatu sibona be ia namo herea momokani.

⁹⁷Lohiabada e, oiemu taravatu lau ura henia. Dina ena hora ibounai lalonai, oiemu taravatu lau laloa noho.

⁹⁸Oiemu taravatu be lau dekenai ia noho nega ibounai, bona ia ese aonega lau dekenai ia henia noho. Inai aonega ese, lau dekenai idia tuari taudia edia aonega ia hereaia.

⁹⁹Lauegu diba ese, egu hadibaia taudia ibounai edia diba ia hereaia noho, badina be lau ese Dirava ena hadibaia hereva lau laloa noho, ma lau laloa noho.

¹⁰⁰Bona egu aonega ese tau buruka edia aonega ia hereaia noho, badina be oi Dirava, oiemu oda hereva lau badinaia noho.

¹⁰¹Lau ese kara dikadia dekena amo lau raka siri noho, badina be lau ura Dirava ena hereva do lau kamonai henia.

¹⁰²Lohiabada e, oiemu hadibaia hereva dekena amo lau raka siri lasi, badina be oi sibona ese, oiemu hereva lau dekenai oi hadibaia noho.

¹⁰³Lauegu uduna dekenai hani ena mamina be namo momokani, to Dirava e, oiemu hereva ena mamina ese hani ena mamina ia hereaia noho.

¹⁰⁴Lohiabada e, oiemu taravatu ese ura namodia lau dekenai ia henia noho. Unai dainai kara dikadia ibounai lau ura henia lasi.

¹⁰⁵Lohiabada e, oiemu hereva be lamepa bamona, lau ia hakaua noho, vadaeni lau raka maoromaoro diba. Oiemu hereva be diari, ia ese egu dala ia hadiaria noho.

¹⁰⁶Lau ese lau gwauhamata vadaeni, oiemu hadibaia hereva maoromaorona do lau badinaia, vadaeni inai gwauhamata do lau makohia lasi momokani.

¹⁰⁷Lohiabada e, egu hisihisi be dika momokani. Oiemu gwauhamata hegeregerena oi ese lau do oi hamauria.

¹⁰⁸Lohiabada e, lau be oi dekenai lau guriguri, bona oi dekenai lau tanikiu henia. Lauegu tanikiu mani oi abia dae, bona oiemu oda hereva lau dekenai do oi hadibaia.

¹⁰⁹Nega ibounai mase be kahirakahira lau dekenai, to lau ese oiemu taravatu hereva lau laloaboio lasi.

¹¹⁰Kara dika taudia ese tarapu idia atoa, lau do idia hadikaia totona, to lau ese oiemu hadibaia hereva lau rakatania lasi.

¹¹¹Oiemu oda hereva be nega ibounai lau dogoatao noho, badina inai hereva be egu kudouna ena moale gauna.