Salamo 119:170-176

¹⁷⁰Egu awanori bena i saewa oa matam eai; u saguhaigu gonogonoana doha u ribaei wa!

¹⁷¹Eau sopagu eai ea hedebasaem paana oa em lauhesom ribadi u heatagu.

¹⁷²Eau memenagu eai em riba abo ea wanai, paana oa em lauhesom ribadi gamagaridi se dudurai.

¹⁷³Oa nimam taba i nonoha i saguigu, paana oa em lauheata ribadi wa ea abi hineridio.

¹⁷⁴GUIAU e, oa em abihemauri ea gadohi aririei, eo em laugagaeo egu aba kode ede.

¹⁷⁵Eau earuagu bena i mauri, abo ea hedebasaem, eo em hesanapu ribadi bena se saguigu.

¹⁷⁶Eau ea laupono doha mamoe ie gege wa; em heaheari tauna taba u eo’oi, paana em lauhesom ribadi nige esau ea nuahuiei.