Iba Gana 119:170-176

¹⁷⁰Ainde i̱na í̠hondo bi larogo baya hangu hale halu í̠na pele ngialu haru dai bule laridagua áyu i̱ pele ngibe.

¹⁷¹Í̠na í̠naga mana lo ngeru i̱ lawai haabo haga kegonaga i̱na í̠naga mini yaraga haabo halu holebero.

¹⁷²Í̠naga bi mana damenego bayale tigabi dege ngegonaga i̱na mana ogoni lalu iba gana la halu holebero.

¹⁷³Í̠naga bi mana damenego bibahende talialu bialu kogonigo ai nde í̠na i̱ biamogo bule manda bu haabo habe.

¹⁷⁴Anduane Homogo-o i̱ pele ngialu haru dai bibelonaga ha dege biwane i̱naga bu miniha tandaga bialu i̱ hongo ereba haragoni. Í̠naga bi mana lo ngegome i̱ mo turu haga biaga ngagoni.

¹⁷⁵Í̠naga mini yaraga halu holiya í̠na i̱ha holene bayaleore ngibe. Í̠naga bi lo ngegome i̱ biamogo bia helo hameledo.

¹⁷⁶I̱ hariga bayale yu wahalu pu tara howa i̱ nogo sibi pu ereba hene ale ko. I̱na í̠naga bi mana lowini ngeru yu wanahagaore kogo manda buwa í̠na í̠naga biabe biahaga i̱ kogonigo i̱ taya bibe.