RUUMIYA 5:2-21

²Dhali e a’di si’da/ ana takina ki bway mo eya ’the yansan mo jin doshkina ana nycine/ mo be. Dhali ana ’kunya bwa mo e mo ma ’teŋ kap̱em bana gi monyca ma Arumgimis jin pwaḵkunu ana bwa mo be.

³Dhali ki nyanye/ kan tan mo tani ana ’kunya bwa mo e moŋ’kosh is ka nyor bana mo dhali mmomisha ana ki mo/isa nyor pucurki’d mo mmogam ’pemen ki mo jin minu ’dim ’kup̱ mo be.

⁴Dhali mo jin minu ’dim ’kup̱ mo pucurki’d mo mmogam ’pemen ki mo jin wanu gwo kan ibwa mo be dhali mo jin wanu gwo kan ibwa mo tani pucurki’d mo mmogam ’pemen ki mo ma ’teŋ kap̱e/ mo be.

⁵Dhali mo ma ’teŋ kap̱e/ midi diki biṯ ana bwa ka luŋgu’b mo haali/ mo/en ma Arumgimis gac̱kunu eya dum bana ki Shi/in Dheleladhelel mo, a’di jin c̱ikunu ana mo be.

⁶Dhali ki ana ’kokina ki dar gi ’bi’th mo tani ki embula ’borga/ yansan mo tani aḴrisṯẖos wuki’d mo gom ku gi ushuna ush goma Arumgimis mo be.

⁷Hili a’di diṯa mii gom jan ṯal ’de/ mo mmo’taki wu mo gom a’di jin ta wathiŋ ḵar/e mo – bahili gom wathim ’boro’d mo tani jan ṯal ’de/ midi ’taki budha du mo mmowu mo be.

⁸Hili Arumgimis ṯorki mo/en piti gom ana mo haali/ ki ana ’kokina mo mmota imanmii miinthus naskina/ mo tani aḴrisṯẖos wuki’d gom ana mo be.

⁹Dhali haali/ a’di wakan mo tani mmodhukunu ana ki mo ma ḵar/e shwane/ ka bas piti mo tani bakata ’te/ beseene/ ana minu ta is ki me’d mo ki a’di ’pena nyor ma Arumgimis mo be.

¹⁰Haali/ waḵki/ ana gwamkunu ka Arumgimis mo mmota isa ’de/ mo ki mowu gi Ya/m piti mo tani ki ana ’kokina mo mmota ’kup̱ gom a’di mo tani bakata ’te/ beseene/ ana gwamkunu mo mmota isa ’de/ mo shwane/ tani ana minu ta is ki me’d ki mondiki/em piti mo be.

¹¹Dhali a’di diki wakan jasi ’te/ mo hili ana si’da/ mina bwa ’kuny mo eya Arumgimis mo ka Ḵrisṯẖos jin ta Tap̱a Yesus bana mo. E a’di mo tani ana bu’thkina moŋgwam bana mo mmota isa ’de/ mo be.

¹²Dhali me’d jin p̱u’dkina miinthus eya ’cesh ki wathim pan ’de/ mo tani dhali wu mo gom miinthus mo tani dhali wakan mo tani miinthus peperki’d eya ris ’kwani ’baar mo haala ris ’kwani ’baar mo miiki miinthus mo be.

¹³Dhali ka jiŋ gana/ miinthus ishki’d e mony’cesh yansan nṯwa/a/ ki gwoŋḵan jin c̱inu mo ’konuki c̱i mo be. Dhali hili miinthusa kamu/ yisa karuwa waḵki/ gwoŋḵan p̱iyi’d mo be.

¹⁴Dhali hili wu seki’da Aadama p̱o/ ntaga Musa mo, ap̱o/ uni gwansan si’da/ kun takin gi miinthus kun waki gwon dhaŋ ma Aadam yisa. Aadam ta’da shimpira/ mii gom a’di jin midi yayu/ mo be.

¹⁵Dhali hili, to jin c̱inu ki me’d mo tani diki waki gwon dhiŋ mo. Haali/ waḵki/ ’kwani ka ris wukin mo goma dhiŋ gwo gi wathin ’de/ mo tani bakata beseene/ a’the ma Arumgimis dhali to jin c̱inu ki me’d eya ’the gi wathin ’de/ c̱aan jin ta’da Yesus Ḵrisṯẖos mo tani ishki’d mo gom ’kwani ka ris mo be.

¹⁶Dhali to jin c̱inu ki me’d mo tani diki waka du’d mii ’peni miinthus wathin ’de/ c̱aan si’da/ mo. Haali/ mii jin c̱inu isa nyoḵ jin baṯẖki gwon dhiŋ ’de/ mo tani a’di iḵalki miiwaḵ mo. Hili, to jin c̱inu ki me’d mo jin baṯẖki gwon dhiŋ ka ris mo tani ḵalki mo jin dhunuwa dhu ka ḵar/e mo be.

¹⁷Waḵki/ gwon dhiŋ gi wathin ’de/ ḵalki wu mo jin seki’d ap̱o/ mo gom wathin ’de/ yan tani bakata beseene/ mmina uni se ap̱o/ mo e moŋ’koki/e mo ki wathin ’de/ yan jin ta’da Yesus Ḵrisṯẖos mo, uni gun bu’thkina ’the jin ishki’d ka enthus mo dhali to jin c̱inu ki me’d ki mo ma ḵar/e mo.

¹⁸Dhali wakan si’da/ gom gwon dhaŋ gi wathin ’de/ mo tani gwon dwall p̱u’dki’d ap̱o/ aris ’kwani ’baar mo e miiwaḵ mo be. Dhali wakan si’da/ gom jan ṯal ’de/ jin mii’d ki mii ma ḵar/e mo tani mo jin dhunuwa dhu ka p̱o/ ki moŋ’koki/e mo p̱u’dki’d mo eya ris ’kwani ’baar mo be.

¹⁹Haali/ gom jan ’de/ jin ta’da a/ushiŋgwo mii mo tani ’kwani ka ris warkin ki imanmii miinthus mo be. Dhali wakan si’da/ gom jan ṯal ’de/ jin ta’da manha gwo e mo mmomii mo tani ’kwani ka ris si’da/ minu warku/ ki imanmii miiŋḵar/e mo be.

²⁰Dhali yan’ko’d gwoŋḵan jin c̱inu mo a’di p̱u’dki’d mo jin mina gwon dhaŋ imar is mo. Dhali hili me’d jin markina miinthus is mo tani a’the ishki’d ki nyanye/ mo be.

²¹Dhali wakan si’da/ me’d jin sekina miinthus ap̱o/ mo gi wunu mo tani a’the si’da/ midi se ap̱o/ mo ma ḵar/e ki mondiki/e ki sule/ ya ye ’ba/ mo eya Yesus Ḵrisṯẖos Tap̱am bana mo be.