Ruki 12:18-45

¹⁸Areme fu una kuae, Na vierafe na uijaka none isesina faraena una mamekanu saekina na uije none boeje ijia nake.

¹⁹Areme rade na vierafero nane manido na juaevasia boeje nabe una imeke. Rove name ijia fina ire ije na kanafuiva ije ikinu fivakono kuaeke.

²⁰Rove Godi fu una e ije kuako, E buzeme gare aeje a ivia muge baroneke. Ro ire one boeje a kanafuima ije erare karikono kuae?

²¹Areme Jesu fu uri vua fuone kuaria furikiro kiae, Vame besu ijiege e buka sinuome zaraena karike. Rove bu naebe Godi ma vierafekuva e ijieki ije bu Godido nidua ijia buka e sinuome baki igekino kiae.

²²Areme Jesu fu urina e vua fuone fievo ije kuariana kiae, Jade maza boeje uri ire ja ikinu karivadufuo ijiakiro ugone ja sadufuo ije uruke vierafevo.

²³Ijadufuo maeje one a fivadufuo ijare fuka ma anuigi. Ro una ire ivo ije fume isekube. Ro kuke vajae one fuka ma anuigi ro ugone ije fume ire isekube ijadufuo ja ije mukore vierafedufuo.

²⁴Ro kuke ni ume ije vierafefo. Buje bu uije okinu ro kanafuivo baki. Ro kuke bu are bu ire nadufuo ije bu baki rove fune Godire samuagiakinu ire vajiamo. Ijadufuoro jaeje jaka ume ijieki baki ro ja Godido nidua ijia jaka e anuigi bino.

²⁵Ro a uri izege a fivadufuo ije ireobo vierafenoekuva a izege one a fivako ije abe bio jiamado nijana fivakuma baki.

²⁶A ire isekube ijieki ije a naebe mukoreigia renoeno ije a irerefuo una ire mamekanu ije renoekiro vierafeme?

²⁷Ro kuke ni kusare taraeko ni buone mukore ije bu tavuana iravo ije giafo. Buje bu korubuo ugone bu savo ije amaeriavo baki. Ro kuke e kini Soromoni fuka e anuigi ijadufuo ugone fu samo ije buka ni mukore. Rove bune kusare ni mukore binobino bu iravo ijiebe buka Soromonido ugone ni mukore fu samo ijene ma asidiae.

²⁸Ro ni kuke una vajoma ije vierafefo. Bu ivia ireva a giae ro isuome a una vaga fune saere. Rove Godi vajoma ije fuka uria samuagiame. Ro una ema ije jaeje ja ire kusare ijieki baki ijadufuo Godi ja fuka maza boeje samuagiakinu ifejiamo. Ijadufuo ni Godi ma vierafekinu karinoefo.

²⁹Ro jade maza boeje uri dokiro ire ja idufuo ijadufuo karina vierafevo.

³⁰Ro vame ijieki ije bu e ije Godi ma vierafevo baki ijiebe ijiege karina revo. Ro ire binobino ja karina vierafevo ije asoe jone saove gufia fino ije fune giana vierafe.

³¹Ijadufuo ja karina ire binobino uruke vierafevo ije aregaro amure urina Godido i ije mega fu ja samuagiakinu ifejiadufuo.

³²Jesu fu ijiege kuaria areme kiae, E sibaneke gure ja vua none ige fievo ije jade jumevo. Ijadufuo maeje Asoe jone ije fu ja kiaga jare ire fuone boeje fu samuagiamo ije gue samuagiadufuo.

³³Ijadufuo ni va ire jone boeje kena fuaeve areme moni ije kena una e sinuome baki ije vajiafo. Ro jade uri sinuome bu rade bakiredufuo ije ireobo vierafevo. Ro nika urina saove gufadufuo ire maeje bu rade bakirekuva baki ijene kanafuifo. Ijadufuo maeje ire jone maeje saove gufia naovo ije e bube iniemejiake ro kuke fanufanu bube arafiriajiake.

³⁴Ijadufuo ja oenoejo ije oe jone nika ire maeje bu izia naovo ije vierafenoefo. Ijadufuo maeje ire maeje jone boeje bu izia naovo ije oe jone budua bu ijia naodufuo.

³⁵Jesu fu ijiege kuaria areme una vua be mena kuariae. Fu kiae, Janika ire be fu rekuvega ja samua karivo ijiege rena uri ugone jone kena mukoreigia sana ivia kiriama areme raete jone kena sanana samua karinoefo.

³⁶Janika e imevo bu e buone ireobo fu iro bu maninamikuae ijo ijia vakiro kiana vakoga bu samua kariva ijiege refo. Bu samua kariga fu una ro fie bu uri migegire viene daovedufuo ijiege janika samuafo.

³⁷Ro e ije erarebe bu e ireobo buone fu una ruoga bu uria samuana kariva fu giadufuo ije buka oemaredufuo. Areme fu urina kiako, Jaeje ja naebe totei ro jaka uria mukoreigia vierafena na samuagiena karinoe. Ijadufuo ni ro are none igia karike na ire vajiaga ja ino kiakono kiae.

³⁸Jesu fu ijiege kuaria areme kiae, Na ve ufirema ijia ro suoke mu gamia ruoga ja uria ijiege samua karikuva naka jone ireobo oemareke.

³⁹Ro kuke igia fiefo. E iniemeno be fu iniemeke ruoga e are koeki fu naebe ninae ro fu uria fino ije e inieki fu izege aruna iniemekuma baki.

⁴⁰Ijadufuo jadua janika ijiege samua karinoefo. Ijadufuo maeje Ema ijiebuo Fari ige na maza ije ja naebe vierafeva na ijia una ruakono kiae.

⁴¹Areme Fita fu urina Jesu kuae, E Ireobo vua ije a mena kuaruema ije a no fiedufuo ije kuarue ke a e boeje ijiebuo kuaruemano kuae?

⁴²Areme Jesu fu una kuae, E ije erare fu uria mukoreigia giriesana ma vierafena imenoeno e ije e ireobo fuone fu kuaga fure una e ije bu fuina imejo ije samuagiadufuo. Fure ijiege samuagiakinu maza maejia ire buone vajiake.

⁴³Ro e ireobo fuone fu una ro keke ije gakuma fuka fuone oemarekono kiae.

⁴⁴Jesu fu ijiege kuaria areme uri kiae, Vua ige naka ma kuariave. E ireobo fuone ije fu uri e ije kuaga fure una ire fuone boeje samuagiake.

⁴⁵Rove e imeno fu una fue kuaeko, Na vierafe e ireobo none fube migegire una ruake ro fuka saroena ruake. E ije fu ijiege kuaena fune uri e fuina imejo bara ro baru ijene ifiana uri ire ikinu do kugi ina nigofo iserenoeke.