Rukas 1:49-68

⁴⁹tak'ëp baad hadoo do P'op Hagä Doo, sahõnh haj'ap do banoo do hyb n'aa hã ỹỹ. Tsyt hẽ, sahõnh hẽ nesaa do mahǟnh né tii. Baad had'op do né tii.

⁵⁰Sahõnh hẽ badäk hahỹỹ hã habong doo, sa panaa na-ããj né hẽ, ta hã hyb n'aa jew'yyk doo, P'op Hagä Do t'yyd mehĩĩn had'yyt hẽ.

⁵¹Tak'ëp hejoonh do P'op Hagä Do mo haj'aa. Hahỹỹ da tamo haj'aa: Jé pad'yyt hẽ dawë hã tabetyn hõm h'yy kasab'ee doo gó sa hã hẽ h'yy kasadä doo, P'op Hagä Do karẽn do raty n'aa ges'yyk doo.

⁵²Tasog hõm hyb n'aa jewyk do sa hejój, ti taban'oo kän hyb n'aa sakog is do sa hã.

⁵³Baad taban'oo kän sa tä, sa waa, has'aah do sa hã. Tan'oo kän ta si n'aa hẽ rababaaj hõm tak'ëp ma enäh do paah.

⁵⁴Tamasaa wät Isaraéw buuj, ta karom. Ta t'yyd mehĩĩn had'yyt sa hã.

⁵⁵Dooh tamabaan bä Abaraãm hã, Abaraãm panaa hã taky n'aa enooh doo. Nahëëj sa hã taky n'aa enooh do paah —näng mä Marija kyyh.

⁵⁶Ti m' tamawoob hẽ kamarab Marija bayyw kän mä Isabew tób bä. Ti m' tababaaj hõm kän ta tób hẽnh.

⁵⁷Ti m' Isabew t'aah benyy däk bä kä, enäng mä kä aj'yy.

⁵⁸Isabew pa haj'eenh doo, ta wakããn na-ããj mä rapanyyg enä hõm bä kä, ratsebee kän mä ta sii. Isabew P'op Hagä Do t'yyd mehĩĩn, rahegãã bä.

⁵⁹Ti m' ta t'aah 8 ta ǟh tabahado däk bä, sa wakããn, sa pa haj'eenh do na-ããj hẽ rabana ta t'aah masuuj noo byyh kahõg hõm do raheg'ããs. Rakarẽn mä ta häd ramaneëënh Sakarija, ta yb häd.

⁶⁰Ti m' Isabew ky hadoo: —Dooh —näng mäh. —Ta häd da Jowãw —näng mäh. Ti m' raky hadoo ta hã:

⁶¹—Hëd n'aa ta tii d' ta häd? —näk mäh. —Dooh ta tii da Jowãw häd näng pé bë wakããn —näk mäh.

⁶²Ti m' sa moo me rameaanh ta yb hã nyy da ta t'aah häd.

⁶³Ti m' ta moo me Sakarija metsẽẽ ta hã rabanoo raher'iih doo. Ti m' rahyb n'aa meuuj bong terih do hã. “Jowãw” mä terii däk.

⁶⁴Tii bä kä m', taber'ood däg kän p'aa hẽnh kä. Ti m' Sakarija j'aa etsëë kän mä P'op Hagä Doo.

⁶⁵Ti m' sa pa haj'eenh do rahyb n'aa meuuj bong mä tak'ëp. Jé pad'yyt hẽ waëë habëëh hẽnh mä Judah häj n'aa bä ta ky n'aa raher'ood hõm kän mäh.

⁶⁶Sahõnh hẽ ta ti maa new'ëë do panyyg hã, rahyb n'aa newëë, rahyb n'aa tón. Sa h'yyb gó m' raky hadoo: —Hyb n'aa jawyk da ta ti karapee —näk mä sa h'yyb gó. Tii da sa h'yyb gó rawén her'oot, P'op Hagä Do hejój karapee hã tabawät do hyb n'aa.

⁶⁷Ti m' baad mä Sakarija h'yyb gó P'op Hagä Do Sahee badäng. Ti m' tadu doo tabaher'oot ta jawén hawät doo, P'op Hagä Do metëëh doo. Ti m' taky hadoo:

⁶⁸—Taw'ããts hẽ Tak'ëp Hyb N'aa Jawyk Do hã, Isaraéw buuj rah'yy kaha'eeh do ër j'aa etsë. Tabahyng ta karapee tabed'ëëp hyb n'aa nesaa do mahǟnh.