Romanos 15:5-31

⁵To⁴nca³ je² Ni³na¹ xi³ tsjoa¹ cjoa⁴tse³jta³ cao⁴ cjoa⁴ni²je³ta³con², cˀoa⁴ ca²ta³tsjoa¹-no³ nca³ to⁴jnco³ cjoa⁴fa³ˀai³tsjen³ ca²ta³sˀe³jin³-no³, jo³-sˀin² qui³tso² Cristo Jesús,

⁶jme¹-ni³ nca³ to⁴jnco³ coan⁴-si¹nio³, nca³ to⁴jnco³ cjoa¹jtao³ nca³ chˀa⁴sje³je³yao³ Ni³na¹-le⁴ cˀoa⁴ Nˀai³-le⁴ je² Nai³-na¹ Jesucristo.

⁷Coi³ cjoa⁴ nca³ cˀoa⁴-sˀin² chjoe¹tjao² xi²nquio⁴³, jo³-sˀin² nca³ Cristo qui³scoe¹tjao²-na¹ xi³ tˀa³tsˀe⁴ cjoa⁴je³ya³-le⁴ Ni³na¹.

⁸Cˀoa⁴xin³-nia³ nca³ Cristo Jesús coan³ cho⁴ˀnta³-le⁴ cho⁴ta⁴ xi³ tsˀe⁴ cjoa⁴circuncisión xi³ tˀa³tsˀe⁴ cjoa⁴qui²xi⁴-le⁴ Ni³na¹, jme¹-ni³ nca³ cˀoe⁴²jnco³-si¹ni³ je² cjoa⁴ xi³ Ni³na¹ qui³si³sˀe³nqui³-le⁴ nˀai³jcha¹cjin³-na¹,

⁹cˀoa⁴ jme¹-ni³ nca³ je² cho⁴ta⁴ xi³ li² judío-jin² cˀoa⁴sje³je³va³-si¹ni³ Ni³na¹ tˀa³tsˀe⁴ cjoa⁴ma⁴ta³con²-le⁴, jo³-sˀin² tji¹tˀa³: Coi³ nca³ an³ si³qui²xi⁴ya³nta³ tˀa³tsi⁴ ja⁴jin³-le⁴ cho⁴ta⁴ xi³ li² judío-jin², cˀoa⁴ se³ya²³-nia³ tˀa³tsˀe⁴ jan³ˀain¹-li⁴.

¹⁰Cˀoa⁴ nqui²jnco³cˀa² tso²: Ca²ta³ma³tsjoa³ya³-no³ xi³ cho⁴ta⁴ xi³ li² judío-jin², cao⁴ na⁴xi⁴na³nta¹-le⁴ Ni³na¹.

¹¹Cˀoa⁴ nqui²jnco³cˀa² tso²: Chˀa⁴sje³ntao³ Nai³-na¹ nca³tsˀio³ xi³ cho⁴ta⁴ xi³ li² judío-jin², cˀoa⁴ nca³tsˀi³ na⁴xi⁴na³nta¹ chˀa⁴sje³je³yao³ Ni³na¹.

¹²Cˀoa⁴ nqui²jnco³cˀa² tso² Isaías: Jtsˀen¹-le⁴ Isaí cjoi⁴nčhoa³-ni¹, cˀoa⁴ je² xi³ coi⁴so¹tjen⁴ nca³ coa⁴te²xo³ma³-le⁴ cho⁴ta⁴ xi³ li² judío-jin². Je² cho⁴ta⁴ xi³ li² judío-jin² sco¹ya³cao⁴cjoa⁴-le⁴ nca³ je².

¹³Cˀoa⁴ je² Ni³na¹ xi³ tsjoa¹ cjoa⁴cho³ya²cao⁴cjoa⁴, ca²ta³si¹tse³-no³ cao⁴ nca³yi³je³ cjoa⁴tsjoa³, cˀoa⁴ cao⁴ cjoa⁴nchˀan¹ta³con² nca³ ma³cjain¹-no³, jme¹-ni³ nca³ coan⁴ncjin²ya³-si¹ni³no³ cjoa⁴cho³ya²cao⁴cjoa⁴ xi³ to⁴tˀa³tsˀe⁴ nca³nˀion¹-le⁴ je² Espíritu Santo.

¹⁴To⁴nca³ ña³qui³ tjin¹jnco³coan³ xi³ tˀa³tsaon⁴³, ntsˀe³, nca³ ti⁴jon²-nio³ nˀion¹ ma³tse³-nio³ cjoa⁴nta³, tjin¹yi³je³-no³ cjoa⁴fa³ˀai³tsjen³, cˀoa⁴-ti⁴ coan⁴-no³ cˀoin¹ya³-lao⁴³ xi²-nquio⁴³.

¹⁵To⁴nca³ coan³nˀion¹coan³ nca³ jnco³jao² cˀa² qui³squi³-no³, ntsˀe³, jo³-sˀin² nca³ qui³si³cja³ˀai³tsjen³-no³, nca⁴ cˀoa⁴-sˀin² Ni³na¹ qui³tsjoa³-na³ je² cjoa⁴nta³.

¹⁶Nca³ an³ coan³ cho⁴ˀnta³-le⁴ Jesucristo tˀa³tsˀe⁴ cho⁴ta⁴ xi³ li² judío-jin², nca³ si³xa¹coa⁴ en¹nta³-le⁴ Ni³na¹, jme¹-ni³ nca³ je² cjoa⁴tjao² xi³ tsjoa³tˀa³, xi³ coi³ cho⁴ta⁴ xi³ li² judío-jin², sa⁴sen¹con³-ni³le⁴ Ni³na¹, nca³ coan³tsje³ cao⁴ je² Espíritu Santo.

¹⁷Jo³-sˀin² ti²jna⁴coa⁴ Cristo Jesús, tjin¹-na³ jme³ xi³ cˀoa³sje²je³ya³-nia³ yao³-na⁴ ja⁴tˀa³tsˀe⁴ xa¹-na⁴ xi³ tˀa³tsˀe⁴ Ni³na¹.

¹⁸Li²coi³ coan⁴nˀion¹coan³ nca³ coi³nchja²³ to⁴jme³ cjoa⁴-ni³, to⁴je² cjoa⁴ xi³ Cristo qui³si³nta³ xi³ to⁴tˀa³tsˀan⁴ cao⁴ en¹ cˀoa⁴ cao⁴ xa¹, jme¹-ni³ nca³ cho⁴ta⁴ xi³ li² judío-jin² si⁴²cji³tjo³son²-si¹ni³le⁴.

¹⁹Qui³si³xa¹³ cao⁴ nca³nˀion¹-le⁴ cjoa⁴xcon¹ cao⁴ choa⁴, cˀoa⁴ cao⁴ nca³nˀion¹-le⁴ je² Espíritu Santo xi³ tsˀe⁴ Ni³na¹. Cˀoa⁴-sˀin² tsa³ca²sen⁴tsˀia³cao⁴-nia³ ya⁴ Jerusalén, cˀoa⁴ xi³ cao⁴ ya⁴ ntai³-le⁴ sa³ˀnta³ ya⁴ Ilírico, je³coan³jnco³-na³ nca³ qui³si³cˀa³tji³vi¹soan²³ nca³qui³jnta² je² en¹nta³ xi³ tˀa³tsˀe⁴ Cristo.

²⁰Cˀoa⁴-sˀin² nca³ tsˀa³sje³ nca³nˀion¹-na⁴ nca³ qui³nchja²ya³ je² en¹nta³-ve⁴, a³li² ya⁴-jin² jña³ nca³ je³qui³no²cjoa⁴ jan³ˀain¹-le⁴ Cristo, jme¹-ni³ nca³ tsi² si⁴²quin³son²-si¹nia³ čhjao¹ja⁴ma⁴ xi³ tsˀe⁴ xi³ cja⁴ˀai¹.

²¹To⁴nca³ jo³-sˀin² tji¹tˀa³: Je² xi³ tsi²coi³ qui³no²cjoa⁴ya³jin³-le⁴ tˀa³tsˀe⁴ Cristo, scoe⁴-ni¹. Cˀoa⁴ je² xi³ tsi² tsa² qui³nčhˀoe¹, coan⁴cho⁴ya³-le⁴.

²²Coi³ cjoa⁴-vi⁴ nca³ ncjin² cˀa³ qui³sˀe³chjoa²-na³ nca³ cjoa²ˀai⁴con³-no³ nca³ jon² tsa²cai³.

²³To⁴nca³ ntˀai⁴-vi⁴ntai⁴ tsin²-sa³na³ ˀnte³ nca³ si³xa¹³ i⁴ ˀnte³ je²-vi⁴, cˀoa⁴ coan³ ncjin² no¹-jan¹ nca³ coan³me³-na³ nca³ qui³con³-no³.

²⁴Coi³ cjoa⁴ cˀia³-la³⁴ nca³ cjoia¹³ España, cjoi¹con³-no³ nca³ jon², nca³ tjin¹-na³ cjoa⁴cho³ya²cao⁴cjoa⁴ nca³ cjoa²ˀa⁴ co³tsen³to³-no³, cˀoa⁴ coi⁴ncha³cao⁴-nao¹³ nca³ jon² nca³ cjoia¹³ ya⁴-jan¹, cˀia⁴ nca³ ti¹tjon² ca²ma³tsjoa³ya³ jnco³tjo²-na³ cao⁴ jon².

²⁵To⁴nca³ ntˀai⁴-vi⁴ ti²fi³-nia¹³ ya⁴ Jerusalén nca³ coa²sen⁴coa⁴ cho⁴ta⁴-le⁴ Cristo.

²⁶Nca⁴ ya⁴ Macedonia cao⁴ ya⁴ Acaya coan³tsjoa³-le⁴ nca³ qui³tsjoa³ taon⁴ xi³ tˀa³tsˀe⁴ cho⁴ta⁴yo⁴ma⁴ xi³ tsˀe⁴ cho⁴ta⁴-le⁴ Cristo xi³ tjio¹ ya⁴ Jerusalén.

²⁷Nta³ coan³tsjoa³-le⁴ nca³ cˀoa⁴qui³sˀin³, cˀoa⁴ qui³tjen⁴-le⁴ xi³ tsˀe⁴. Tsa² cho⁴ta⁴ xi³ li² judío-jin² cˀoa⁴-ti⁴ tsˀa³cao⁴tˀa³-le⁴ cjoa⁴nta³ xi³ tsˀe⁴ Espíritu Santo, cˀoa⁴²-ti⁴ tjin¹ne²-le⁴ nca³ je² nca³ coi⁴ncha³cao⁴ tso³jmi²-le⁴ son³ˀnte³-vi⁴.

²⁸Cˀoa⁴-sˀin² cˀia⁴ nca³ cjoe⁴ si³jncoa³ cjoa⁴ je²-vi⁴, cˀoa⁴ cˀia⁴ nca³ cjoe⁴ si³cˀa³sˀen³-le⁴ je² cjoa⁴tjao²-vi⁴ je²-vi⁴, cˀia⁴ cjoa²ˀa⁴to³-no³ nca³ cjoia¹³ ya⁴ España.

²⁹Cˀoa⁴ ˀve³-nia¹³ cˀia⁴ nca³ cjoi³cho³con³-no³, cjoi³cho²cao⁴-nia¹³ xi³ nˀion¹ tse³ cjoa⁴nta³ xi³ tsˀe⁴ en¹nta³ tˀa³tsˀe⁴ Cristo.

³⁰To⁴nca³ vˀe³tsˀoa²³-no³ ntsˀe³, xi³ to⁴tˀa³tsˀe⁴ Nai³-na¹ Jesucristo, cˀoa⁴ xi³ to⁴tˀa³tsˀe⁴ cjoa⁴tjao²cha³-le⁴ Espíritu Santo, nca³ to⁴jnco³ cao⁴ an³ nˀion¹ vˀao²³ nca³nˀion¹-no³ nca³ vˀe²tsˀoa³-lao⁴³ Ni³na¹ xi³ tˀa³tsˀan⁴,

³¹jme¹-ni³ nca³ coi²tjo⁴ntjai²-si¹nia³ tˀa³tsˀe⁴ cho⁴ta⁴ xi³ tsi²coi³ ma³cjain¹-le⁴ xi³ tjio¹ ya⁴ Judea, cˀoa⁴ jme¹-ni³ nca³ je² cjoa⁴tjao²-le⁴ xa¹-na⁴vi⁴ tˀa³tsˀe⁴ cho⁴ta⁴-le⁴ Cristo xi³ tjio¹ ya⁴ Jerusalén sa⁴sen¹-si¹ni³le⁴,