Romanos 14:1-13

¹Kwian Chubenu gweale me Chube gerua uñe trate, me uñale trate amage bai no age bai me no age Chube gwage, ba geru uñe ma gití dare daba enege, daba e me geru uñe ene, daba ene ole ba me ka boi daba kle tañachuge kare, ma no ba ama gai ngwange no ta no ole ba daba ene chudaboale mo daballanu kare.

²Kwian Chubenu gweale tañachuge lle ulita no gutadale, agwa kwian Chubenu gweale nage me suge ene trate, ama me Chube gerua uñe trate, ama tañachuge me no samla gute, amage suge ama samla gute ama kle age me no Chube dollale, malen ama mo ta gbe bligda me samla ni sidri ole gute.

³Kwian bai kaire samla gute me ñage gerule daba nadi daba me samla gute giti, ene kaire kwian bai kaire me samla gute me ñage gerule daba nadi daba samla gute giti. Me no gerule dabadi ongoru ongoru blire giti, sugedale ba ulitage ba ulita Chubenu, Chube ba ulita gau mo alin, ba ulita salengwli Chube gwage.

⁴Jesucristo ba ulita Chubenu Chugagwalla, ba ulita kwian salengwli malen ni ba gdaite gerudale me no daba na Chubenudi daba kle samla gute giti o daba me kle samla ene gute giti. Che salengwli me ñage gerule dabadi chugagwalla kare, daba kle age no kle age me no giti Chugagwalla Jesucristoge alin allabi uñale, Jesucristo kira molen kwian ta gbe age no mo gwage.

⁵Kaire kwian na gweale tañachuge chui giti chui gweale ma no chui nage mo litangwa gerule Chube ole, kwian na tañachuge chui ulita salengwli no mo litangwa gerule Chube ole, kwian ene ulita kle gerule dabadi ongoru ongoru chui giti. Ma no kwian ulita gdaite gdaite mo kaire kaire mo ta gbe suge chui bai no mo litangwa gerule Chube ole, mo kaire kaire ñage age tañachuge kare.

⁶Kwian gwealege suge trate Chube takalin ama chui gweale gai ma no chui nage mo litangwa gerule Chube ole, kwian e chui gweale ene gai gerungwa no Chube giti kwian ene kle Chube gai dage kle age Chube takalin kare mo alin. Ene kaire kwian nage suge trate chui ulita no salengwli Chube gwage mo litangwa gerule Chube ole, kwian e chui ulita gai salengwli gerungwa no Chube giti kwian ene kle Chube gai dage kle age Chube takalin kare mo alin. Kwian gwealege suge trate Chube lle ulita ketu amage gutadale, agwa kwian nage suge lle gweale me no ama alin gutadale, kwian ene ulita blire ama gerule no Chube ole bligda bai ama kle gute giti, kwian e ulita kle Chube gai dage kle age Chube takalin kare.

⁷Che ulita Chubenu me ñage toi mo alin che takalin kare, che mo ta gbadale toi Chube takalin kare diali, che ulita kle toi Chube giti, Chube kle che manade toi gwade, Chube takalin gire che be jogeda, che me ñage chui gbe mo alin toi gwade chui gbe mo alin jogeda. Cristo che Chugagwalla, che kle toi nga dba ai giti che mo ta gbadale toi age che Chugagwalla Cristo takalin kare diali, kaire che me talladale jogeda giti, che Chugagwalla takalin gire che be jogeda, ama me takalin gire che mi jogeda, che toi gwade kaire che jogeda che mo Chugagwalla Cristonu diali.

⁹Cristo jokeda gire chkuni gwade, malen ama chegu kwian gwade kaire kwian jogeda oña Chugagwallale, che me tañachugale mo giti, ma no che tañachugale ai kare: Che toi gwade che Cristonu ama che Chugagwalla, che jogeda che Cristonu ama jogeda oña Chugagwalla.

¹⁰Cristo che Chugagwalla, ama alin gerule trate ulia kwian kle age giti bai no bai me no, ¿mineade ba kle gerule daba nadi daba kle age giti? ¿Mineade ba kle mo ta dbe me no daba ene ole? Che salengwli me ñage gerule dabadi chugagwalla kare. Chui bdaglige che ulita be kle Chube ngwadi Chube gwa giti ama be gerule che ole che agedu giti ulita nga dba ai giti.

¹¹Chube gerua degaba unsuialin gerule chui bdagli giti, chada e gerule: “Chugagwalla gerudu: ‘Cha gerule ulia ulia chui be chke gire kwian ulitage be suge cha kweri cha ama Chugagwalla, gire kwian be joge chke dba jongnagwa giti cha ngeru be gerule no cha ole: Ulia ba no ba kweri ba kwian ulita Chugagwalla.’ ” Chube gerua degaba unsuialin gerule ene.

¹²Cha gerule ulia ba ulita ole, bdagli che ulita be kle Chube gwa giti gerule Chube ole che ulita mo kaire kaire be gerule mo giti che agedu giti nga dba ai giti.

¹³Bdagli che agali mo kaire kaire be gerule Chube ole mo giti che agedu giti, malen nege che me chagedale gerule dare ongoru ongoru modi kle age giti, ma no ba mo ta gbadale daba na ulita chudaboi, ba chagedale age ta giti daba na gwage, ba age gweale giti ñage suge daba nage e me trate ama alin, daba gwage badi age ene ama ñage joge siere geru uliage ba kle age giti, malen ba mo ta gbadale age trate daba na gwa giti.