Rawumlil dhäwu 14:1-13

¹Ŋuli dhu ga ŋunhi yolŋu nhina nhumalaŋgalnydja malaŋur Garraywalaŋumirriwalnydja yolŋuwal walalaŋgal, yurr ŋayi ŋunhiyi yolŋuny ŋayaŋu-yalŋgi yan, märr-gaŋga yan ŋayi ŋunhi marŋginy Garraywuny, bili ŋayi ŋunhi baḏak yan ŋayaŋu-garrpinawuy ŋäthiliŋuwuŋ romguŋ, yan nhanŋu biyak gumurr-ŋamathi, märraŋ ŋanya ŋunhiyi yolŋuny. Yaka walal gi ŋarrtjurrnydja ŋanya, bäydhi nhanŋu ŋunhi guyaŋanhawuynydja wiripuny, gänaŋ'thundja ga nhumalaŋgalaŋuŋurnydja guyaŋanhaŋur.

²Waŋganydja ŋunhi yolŋu, yurr märr-nhirrpanminyawuy nhanŋu mak ḏäl mirithirr, ga waŋany ŋayi ŋuli ŋunhi bitjanna, “Ŋarrany ga dhuwal märr-yuwalkthirr Djesu-Christku yan, yaka ŋarrany dhuwal garrpinawuy ŋurukuŋdhi ŋäthiliŋuwuŋuny romguŋ. Manymaknha ŋarrakuny, ŋunhi ŋarra dhu ga ḻuka dhuyuny mala warrakan' ga ŋula nhä ŋatha malany, bawalamirra ŋarrany dhu ga ḻuka.” Ga wiripuny ŋuli yolŋu ŋunhi ŋayi ŋayaŋu-yalŋginy, mak waŋa bitjanna, “Ŋarrany ga märr-yuwalkthirr Djesu-Christku yan. Ga dhiyaŋuny bala ŋarrany dhu ga yakan ḻuka warrakan'tja yan, ŋany ḻukany ŋarra dhu ga dhuwal ŋathany mala buku-biran' yan.”

³Ga ŋuli ŋayi dhu ga yolŋuy ḻuka warrakan'tja ŋanak, nheny yakan dhuŋa-lakaraŋ ga gupa-waŋi ŋunhi wiripunhany yolŋuny ŋunhi ŋayi ŋuli gi bäyŋu ḻuki warrakan'. Ga nheny ŋunhiny yolŋu ŋunhi nhe ŋuli ga ŋatha ḻuka buku-birany' yan waŋganydja, nheny dhu ga yakan gupa-waŋa ŋunhiny yolŋuny ŋunhi ŋayi ŋuli ga warrakan'tja ḻuka. Bili God-Waŋarrnydja ŋuli ga ŋunhi gumurr-ŋamathirr bukmakkun yan.

⁴Ŋayiny ŋunhi yolŋu God-Waŋarrwun djämamirr, ga nhakun nheny ŋuli ga ŋunhi ŋanya rom-nyamir'yun? God-Waŋarryun dhu ŋunhi ŋayipin ŋanya waŋganydhun mala-djarr'yundja nhäthinya ŋayi ŋunhi yolŋu, manymak, nhä mak yätjkurr. Yuwalktja ŋayi ga ŋunha dhärrany Garraywala goŋŋurnydja, ga bäyŋun ŋayi dhu ŋunhi galkirriny yätjkurrulilnydja, bili ŋayipi ga ŋunhi Garrayyu ganydjarrnydja gäma ŋayathanharawnydja ḏälkunharawnydja nhanŋu, ga djuḻkthun yan ŋayi dhu.

⁵Yo, wiripuwurruynydja ŋuli ga dhuwal yolŋuy walal guyaŋa yanbi dhuwal waŋganynha yan walu dharrpalnydja beŋur ŋunhi wiripuŋurnydja mala waluŋur, ga wiripuwurruy ŋuli ga dhuwal guyaŋa ŋunhi bukmak dhuwal walu mala balanya bili rrambaŋi yan warrpam'. Ŋathil limurr dhu bukmakthu yan waŋga'-waŋganydhu yan guyaŋany yuwalkkum yan nhaltjan limurr dhu ga ŋunhi märr-yuwalkthirr.

⁶Yo, ŋunhi ŋayi dhu ga yolŋu waŋa bitjandja, “Dhuwandja gay'yi walu gäna yan nhanŋuwuy God-Waŋarrwu,” ŋunhiyin ŋayi ga yolŋu märr-ŋal'yundja ŋuli Garraywuny yuwalkkumany. Ga ŋuli ŋayi dhu yolŋuy ḻuka ŋunhi warrakan'tja ŋanak ŋula nhäny bawalamirrnydja, ŋunhiyiny nhakun ŋayi ga yolŋu märr-ŋal'yundja Garraywalnha yan, bili buku-gurrpanna ŋayi ga ŋunhi God-Waŋarrnhan ŋunhiŋuwuyyiny ŋathapuy mala bukmakpuynha yan. Ga balanyayi bili ŋunhiny yolŋu ŋunhi ŋayi ŋuli gi bäyŋu dhuyu warrakan' ŋanak ḻuki, bili ŋayi ŋuli ga märr-yuwalkthirr nhanŋuwuynha yan Garraywun; ŋayiny ga ŋunhi bitjandhi bili yan Garraywu märr-ŋal'yundhi, ga buku-gurrpandhi ŋayi ŋuli ga ŋunhi God-Waŋarrnhany.

⁷Yo, limurrnydja dhuwal yolŋu mala nhanŋuwuy yan Garraywu, ŋayin ŋunhi limurruŋguny ŋurruŋuny ga buŋgawany. Yaka limurr dhu ga ŋunhi nhina gänany nhakun limurruŋgiyingalnydja limurr djälyu, ga yaka limurr dhu ŋunhi dhiŋgam goŋ-gänany limurruŋgiyingalnydja nhakun djälyu.

⁸Yo, ga bäydhi limurr ga ŋunhi nhina dhiyal walŋany, ga bäydhi mak ŋali dhu ŋunhi dhiŋgamany, yurr baḏak limurr dhuwal nhanukiyingal yan djägaŋurnydja, bala limurr dhu ga ŋunhi dhäruktja ŋanya märraman, bili limurr dhuwal nhanŋuwuy yan Garraywu yolŋuny walal.

⁹Bili Djesu-Christtja ŋunhi ŋayipiny bili muka dhiŋgaŋal, ga bulu ŋayi walŋathindhi dhiyakiyin ŋunhi ŋayaŋuwnydja, märr dhu ŋayipin Garraynydja limurruŋ bukmakkun yan yolŋuwnydja walalaŋ, ŋurikiwurruŋ ŋunhi walal bili dhiŋga'-dhiŋgaŋal, ga limurruŋ ŋunhi limurr ga nhina dhuwal baḏak walŋa yan.

¹⁰Yo, dhuwal ŋunhi Garraywalaŋumirrnydja yolŋu walal bukmak yan waŋganynha malany balanyan nhakun wäwa'manydjiwurrnha. Yurr nhakun nhuma ŋuli ga ŋunhi wiripuwurruynydja yolŋuy walal walŋa nhäma bala mala-djarr'yunna ŋunha wäwa'mirriŋunhany walalany nhumalaŋguwuy nhuma? … bala nhuma ŋuli ga ŋunhi yätjkurr-lakaraman walalany. Ga nhuma wiripuwurr Garraywalaŋumirr yolŋu walal, nhaku nhuma ŋuli ga ŋunhi gupa-waŋany nhumalaŋguwuy wäwa'mirriŋunhany walalany? Bili bukmaknha yan limurr dhu ŋunhi dhärriny nhanukal gumurrŋurnydja God-Waŋarrwalnydja mala-djarr'yunarawnydja. Ŋayipin dhu marrtji ŋunhi mala-djarr'yurrnydja limurruny, yol yätjkurr, ga yol manymak?

¹¹Bili ŋunha djorrayny'tja ga lakaram bitjanna, “Ŋarran dhuwal God-Waŋarr walŋamirrnydja, ga dhuwal ŋarra ga waŋany nhumalany yuwalknha yan bitjandhiny. Yalalany ŋunhi dhä-dhawar'yunamirriynydja waluy, yolŋuny walal dhu gi ŋunhi bukmaknha yan bun'kumu-djipthurrnydja ŋarrakuwuynha, ga bukmakthun dhu gi ŋunhi yäku-lakaraŋuny ŋarranhawuynhan yan biyakun gam', ‘Yuwalk muka dhuwal nhepi yan God-Waŋarrnydja.’ Ga bitjarra ŋayi gan ŋunhi Garraynydja lakaranhamin.”

¹²Yo, ga yalalaŋumirriynydja limurr dhu ŋunhi bukmaknha yan dhärriny gumurrŋurnydja nhanukal bala limurr dhu ŋunhi waŋga'-waŋganynha yan lakaranhamirrnydja nhanukal God-Waŋarrwalnydja ŋunhi nhaliy limurr gan romdhu nhinan, ga ŋayipin dhu limurruny ŋunhi mala-djarr'yurrnydja.

¹³Yo. Yakan buluny limurr dhu ga rom-nyamir'yunmirrnydja bala-räli'yunmirrnydja. Ga bitjandhi bili limurr dhu ŋunhi ḻiya-ŋamaŋamayunmirra, limurr dhu yakan ga wiripuŋunhany yolŋuny walalany ŋayaŋu-miḏikuman.