Romankena 4:15-24

¹⁵I liina dai raqurliani, ma Moses aa Lo i quasiq uuret taqat dadem nget dai be ngere riirl ama Ngemumaqa aa serlinki i raquarli quasiq ai uut tit kut nget. Dav ariq aip kuasiq a nge ama Lo. Dai quasiq ai a qeni iai iv uut tarlik iini iv uure tekmet ne ama vu.

¹⁶Taqurla dai maikka ama Ngemumaqa qe iames nauut i uut tu auur a qevep. I ne aa ngimsevetki be qe iames nauut ama vura na uut per ama aivetki. I qa muvuusep nauirl ai diiv aa lengi nge tit nauirl ver ama aivetki mai. Be lungera ama lengi dai nge taarl ne lura ama qaqet i ra tu araa qevep ip taquarl ma Abraham i qa tu aa qevep. I ma Abraham dai auur a murlka i qa uirl nanaiq uut.

¹⁷De raquarl ama lengi nev ama Slurlka aa Langinka i ngerel sil taqurliani ma’, ‘Sa ngua mak na ngi ip diiv ama qaqet naver ama qerlengiirang i buup niirang dai ara mam na ngi. Liina iara dai ama revan dama Ngemumaqa aa saqang. I ma Abraham ka mu aa qevep sever ama Ngemumaqa aa dlek i luqa i qe iames ne ama ngipta. Be aa lengi ngerel sil ai liirang aa i as kuasik baing se iirang dai diiv iirang nge ren.’

¹⁸I ngen lu, murl ama Ngemumaqa qa meraqen ma Abraham taqurliani ma’, ‘Diip gia laanivas, dai raquarl ama ualdang i maikka buup na nget.’ Dap ma Abraham dai qasa ama serluqa na qa. Dap kuasiq ai qa virliit taqurliani ma’, ‘Ngu lu nanaa ip diip gua laanivas dai buup na ra?’ Dap katiaskerl ka maarl malkuil i qa mu aa qevep ai diiv ama Ngemumaqa qe rekmet taqurla. Taqurla dai saqikka buup ne iari naver ama qerleng mai i ra tu araa qevep ip taquarl ka.

¹⁹De vet lungera ama niirl de qasa ma Abraham dai aa ages ama 100. (De aa ngerlki ma Sara dai ara ages ama 90.) I maikka qa dai qasa ama serluqa. De saqikka aa ngerlki raqurla i ama serluqi. Be qasa quasik mager iv ianel sel a nge ama arluis.

²⁰Dap ma Abraham dai qa tu aa qevep sever ama Ngemumaqa aa lengi i qa muvuusep sever aa uis dap kuasik ka tu aa qevep maberl. Be maikka aa tuaqevep dai ngere riirl be ama dlek pem nget. De ma Abraham dai maikka qa taarl ne ama Slurlka aa rlenki.

²¹Be maikka ma Abraham dai qa maarl malkuil i qa tu aa qevep ai diiv ama Ngemumaqa qe quarl te liina i sa qa muvuusep sever iini.

²²Be ma Abraham ka tu aa qevep taqurla be ama Ngemumaqa qa mis ka ai ama seserlka na qa de aa saqang.

²³Lungera ama lengi i ra iil, ai ama Ngemumaqa qa tis ma Abraham ai ama seserlka de aa saqang, dai quasiq ai liina barek ma Abraham naik.

²⁴Dap kerlka ra iil lungera ama lengi ip barek ngen auut. I saqikka diiv ama Ngemumaqa qa tis uut ai ama seserlta na uut de aa saqang. I raquarli uut tu auur a qevep sever uut Mam i qa maarl ne auur a Slurlka ma Iesus naver ama aapngipki.