Roma 2:11-23

¹¹Paana ede Eaubada tatao nige i heasisi‐napaidi.

¹²Isi se laulau gaibu laugagaeo nige se nuatui, eo edi laulau se baaea, abo hinage se posa mo, nige laugagaeo eai; isi laugagaeona se nuatui, eo edi laugagaeo se baaea, laugagaeona eai hinage abo se heduduraidi.

¹³Paana tatao laugagaeona beadi eai mo se ataataiei, isi nige se dudurai Eaubada matana eai, laugagaeo tauabidi mo isi abo se heduduraidi.

¹⁴Ena Etene tataodi, isi laugagaeona nige se abi, na laugagaeona dobilana se launapai mo, isi laugagaeona nige se abi, taiede, isibom doha i hemala edi laugagaeo.

¹⁵Isi nuaboeadi eai laugagaeo laulauna se urihemasarahao, nuadi hinage se taeataea, eo nuadi se hegiruuioidi e se heduduraiuioidi,

¹⁶nei asubenana ne Eaubada tatao edi nuatu eamuyamuidi abo i lauhetaladi, Iesu Keriso arinai, doha egu evanelia ribana wa.

¹⁷Hage ena esam se tore si ene oa Iudea tauna, laugagaeona eai u mia taubiga, eo Eaubada u ribatausae,

¹⁸ia ena nuatu u ita‐komakomaniyao, eo ginauri lolololodi u awaloloedi, laugagaeona ribana eai se ribahasahasai mo;

¹⁹eo em nuatu adidiri u ene taumatagibugibudi tauwoeaidi ede oa, eo tatao masigiri boeana eai se mia tauhemaradi ede oa,

²⁰tatao supusupudi eo kaimou, oa tauheatadi, laugagaeona eai doha riba mamohoina eo sonoga adi ao ue abi;

²¹oa, tau esau u heata, oabom nige u heatauioim? Oa u guguia tau esau arinai, u ene tabu i aiyahari, oa u aiyahari, e nige’e?

²²Oa u ene tatao tabu se ganaganawari, oa u ganaganawari, e nige’e? Oa oitau u halanuinuiedi wa, numa tabuna ginaurina u abiabi‐gaibuidi, e nige’e?

²³Oa laugagaeona arinai u ribapasipasiuioim, oa laugagaeona u utusi, arinai Eaubada u hebaaea, e nige’e?