Rom 12

1

2

3

4

5

6

7

8

9

10

11

12

13

14

15

16

¹Te dongah manuca rhoek nangmih, Pathen kah sitlohnah lamlong ni nangmih pum te Pathen taengah uem koi neh aka cim, aka hing hmueih la paek ham kan hloep, Nangmih kah mueihla thothuengnah tah he pawn ni.

²Te dongah hekah diklai he rhoii uh boeh, Tedae lungbuei tlaihvongnah neh thohai uh. Pathen kah kongaih neh a boethen, a kolo neh a lungcuei te tah na soepsoei uh ni ta.

³Nangmih ah aka om boeih te kamah taengah m'paek lungvatnah neh ka thui, Poek ham a kuek te poek voelh aih boeh, Pathen loh tangnah cungnueh bangla rhip a tultael te poek hamla muet uh lah.

⁴Pum pakhat ah pumrho muep n'khueh uh van bangla, pumrho boeih loh a pongthoh te amah boeiloeih la a khueh uh moenih,

⁵He yet long he Khrih ah pum pakhat la n'om uh tih pakhat he khat pumrho boeiloeih ni.

⁶Te dongah lungvatnah n'dang uh tarhing ah mamih te kutdoe a poekhloep la m'paek coeng tih tonghma khaw tangnah kah a tarhing la phong saeh.

⁷Bibi te khaw bibi ah, aka thuituen long khaw tah thuituennah dongah, aka hloep long khaw thaphohnah dongah,

⁸aka doedan loh moeihoeihnah neh, aka mawt loh thahluenah neh, aka rhen loh omngaih cangtloeng neh, om saeh.

⁹Lungnah tah hmantang saeh. A thae te tuei lamtah a then taengla kap uh.

¹⁰Pakhat te manuca lungnah neh saelong lamtah, pakhat te hinyahnah neh ngai uh.

¹¹Thahluenah neh om lamtah yaikat uh boeh, Mueihla te cahoeh lamtah Boeipa te salbi pah.

¹²Ngaiuepnah neh omngaih uh. Phacip phabaem te ueh uh. Thangthuinah te khuituk uh.

¹³Hlangcim rhoek kah a ngoengaih te boek uh lamtah yinlungnah te hnuktlak uh.

¹⁴Nangmih aka hnaemtaek rhoek te uem uh. Na uem phoeiah tah thaephoei boeh,

¹⁵Omngaih taengah omngaih uh, aka rhap taengah rhap uh.

¹⁶Khat neh khat te vantlip la khopoek uh, a sang khaw te poek uh boel lamtah tlayae te rhoi uh mai. Namamih khuiah aka cueih la ngai uh boeh,

¹⁷Hlang boeih hmaiah a then la kho aka khan loh a thae te a thae la a thuung moenih.

¹⁸A coeng thai atah nangmih lamloh te hlang boeih neh rhoep uh thae.

¹⁹Thintlo rhoek namamih loh thuung boeh tedae a thintoek te hmuen paek pah. A daek coeng dongah Boeipa loh, “Kutthungnah he kai hut, ka sah bitni,” a ti,

²⁰Tedae na rhal te a pong atah cah, a halh atah tul, Tlamte na saii daengah ni a lu ah hmai alh na poep eh.

²¹A thae neh han noeng boeh, Tedae a thae te a then neh noeng lah.