Rom 16:19-27

¹⁹La maututula tomi lolotia veia amutou omai la mautu e Rom tilimuli tatahoti la merera te Kraist, eala eau sagege pepeho le amutou. Eala moli eau karasuku amutou veia amuto ge rovi tataho la gauru ale taritigi, eala moli umala la vulovulo ale kama kokora eia ge oio bakisi tamutou.

²⁰Mai ge mai ele, eia kama ge tabaa, La Tahalo Uru ge pigi e Satan sotalo te la vaha mutou, amuto ge soa kurua. Amuto ge igoa te la vagagarila te La Tahalo Uru ale vimalilo la tia gatou. La gilogo uru te Iesus, La Uru gatou, eia ge pou tamutou.

²¹E Timoti, ale igogolu vikapopo leau, eia toi la haro soio tamutou. Tio e Lusias, e Ieson, e Sosipata, egiteu e tabarabaragu la tau Iuda tomi omai, egite tai laharoa mutou.

²²Me eau, e Tetias, eau ale kekesi la merera te Pol te la letale, eau toi la haro sesele soio tamutou te la isa La Uru.

²³E Gaias tai veia mutou la haro. Eia vibaumuliau oio te la luma tetala, me amite lotu tai oio tetala. E Rastas, ale vibaumuli la uati te gavman omai, egira me tabara gatou e Kuotas, egira veia mutou la haro.

²⁴La gilogo te Iesus Kraist, La Uru gatou, eia ge pou tamutou, eala moli ele.

²⁵Etato ge vaisale La Tahalo Uru maie: Eia vagari, eia koramulia ge vimagiri vagari amutou, mai te la valolo taku ale eau valoloti le amutou ovola, mai la valolo te Iesus Kraist. Mai ale igoie eia veipalatia la merera ale tabuli kokovu, alaurati te baruata kara igoie,

²⁶me igoie etato matagagati ovola, mai la merera tegiteu la bilalaha tetala, egite kekesia te La Buk Tabu Ale Pala. Mai ale igoie, te la masasagala moli te La Tahalo Uru ale mahuli moli, la tapasila ouka, la merera te Kraist eia vavavati soio te la maututula tomi veia la maratatila tomi ge sau tolea, ge roromulia.

²⁷La Tahalo Uru isasa sekela moli, eia magiri. Me la mari uru tai tetala sekela moli. Etato ge vaisale molia te la isale Iesus Kraist, kara igoie, kara mulimuli, la kaluvula ge ouka. Eala moli ele. Eau e Pol.