1Meke avosia rau si keke mamalaiṉi sapu mae guana pa Zelepade, sapu zama va ululae guahe koari ka zuapa mateana: “La mamu titisi gore ni pa popoa pepeso sari ka zuapa baolo tanisa tinaṉaziri te Tamasa,” gua.
2Meke la titisi gore nia sa mateana vina keke sa nana baolo pa popoa pepeso. Meke razai na tubu sapu vari sisigiti si arini pu vagia sa vina gilagila tanisa kurukuru kaleana, meke sarini pu vahesia sa bekuna sa.
3Meke sa mateana vina rua si titisi gore la nia pa lamana sa nana baolo. Meke ta evaṉae gua tugo na eharadi ri na tie matedi sa kolo, meke mate beto sari doduru tiṉitoṉa toadi pa lamana.
4Meke sa mateana vina ṉeta si titisi gore la nia sa nana baolo koari na leana na ovuku, meke koari na kolo bukaha, meke ta ilirae ehara si arini.
5Meke avosia rau sa mateana tadi na kolo, sapu zama guahe: “Agoi sapu Hopemu, sapu ele koa pukerane, meke sapu korapa koa kamahire, toṉoto sari na Mua vina kilasa koari na tie kaleadi hire.
6Ura va matei rini sari na Mua tie, meke sari na poropita, meke tava zoloro sari na eharadi, meke va napo ni ehara Goi si arini pu variva mate, ura pada tugo sa vina kilasa asa koarini!”
7Meke avosia rau si keke mamalaiṉi sapu vura mae guana koasa hope, sapu zama guahe: “Uve, Baṉara na Tamasa pu tagoi sari doduru ṉiniraṉira, toṉoto meke hinokara hola sari na Mua vina kilasa!” gua.
8Meke titisi la nia sa mateana vina made sa nana baolo koasa rimata, meke tava ṉiṉira sa ṉadana sa, pude kina va sisigiti na rimata sari na tie.
9Meke ta kina va sisigiti nia rina tie sa maṉinina sa rimata, ke zama va kaleania rini sa Tamasa meke sa pozana Sa, sapu ari Nana ṉiniraṉira koari na oza hire. Ba korodia luara pani rini sari na dia sinea, pude vahesia sa Tamasa.
10Meke titisi la nia sa mateana vina lima sa nana baolo koasa habotuana baṉara tanisa kurukuru kaleana, meke tava huporo dudukurumu sa popoa vasina koa baṉara sa kurukuru kaleana, meke garata livodi sari na tie, ura na ta sigiti si arini.
11Meke zama va kaleania rini sa Tamasa pa Maṉauru koari na dia tinasigiti na vinagauru, ba lopu hite luara pani rini sari na dia tinavete kaleadi.
12Meke titisi la nia sa mateana vina onomo koasa Ovuku Iuparetisi sa nana baolo, ke popa sa kolona, pude va nama nia sa siraṉa tadi na baṉara pu mae guadi pa kali gasa rimata.
13Meke beto asa si dogori rau sari ka ṉeta maqomaqo kaleadi saripu doṉo gua na bakarao, sapu hopeke vura mae guadi pa ṉuzuna sa ratovo, meke pa ṉuzuna sa kurukuru kaleana, meke koasa poropita kokohana.
14Arini sari na maqomaqo kaleadi saripu hoke va vura tinavete variva magasadi. Meke vura la si arini koari na baṉara pa doduruna sa popoa pepeso, pude varigara ni, pude varipera koasa rane nomana tanisa Tamasa pu tagoi sari doduru ṉiniraṉira.
15“Dotu! Kote atu kamo va hodaka guana tie hikohiko si Rau! Ba tamanae tugo si asa sapu vaṉunu doduru totoso, meke va nama vekoi sari nana poko, pude lopu ene dododohona meke tava kurekure pa korapa kobi tie,” gua se Zisu.
16Meke varigara ni rina maqomaqo kaleadi sari na baṉarana sa popoa pepeso pa keke vasina, sapu ta pozae Amaqedoni pa zinama Hiburu.
17Meke titisi la nia sa mateana vina zuapa sa nana baolo pa galegalearane. Meke ta avoso si keke mamalaiṉi sapu mae guana koasa habotuana Baṉara pa korapa Zelepade, sapu zama va ululae guahe: “Ele kamo sa totoso,” gua si Asa.
18Meke malara va hodaka sari na kapi, meke pidala na lulusu sa paka maṉauru. Meke kamo si keke niu nomana hola, sapu lopu ele hite ta evaṉa seunae gua ta tavete sa tie pa pinodalaena sa kasia popoa.
19Meke balabala ia Tamasa si pa Babiloni sa ṉati vasileana lavata, ke va napo nia Nana kapa vaeni Sa si asa, sa kapa sapu siṉia sa Nana tinaṉaziri na vina kilasa nomana. Meke ta viqala ṉeta sa pepeso koasa vasileana lavata asa, meke sari na vasivasileana tadi doduru popoa si ta huara beto.
20Meke sari doduru nunusa si lopu ta dogoro, meke sari na toqere ba namu lopu hite ta dogoro tugo.
21Meke hoqa gore koari na tie sari na kabukabue aesi, saripu lima ṉavulu kilo hopeke mamatadi gua. Meke zama va kaleania rini sa Tamasa, sina kaleana sisigiti sa oza asa.
