Qiata Vaiintinavu 13:2-24

²Vi entara vaiinti vo, vira autu Manoaava, Sora vatukaqi vaura. Viva Daanira vohaa anku vauvaro vira naatavano qaqi naahiara/qururaiqama viro kia vainti vataraitiro, vaura.

³Noravano Kotiva atito enseliva vira avuqaa qovarama viro tiharo, Are naahiara/qururaiqama vira kia vainti vataraitira variarava, are vainti taiqama vira qorainti vainti vatatenarave.

⁴Virara irihara raurihara variane. Kia uainive, vo iha namarive, naane. Kotiva qioqama tai karara kia naane.

⁵Ai maaquvano Kotiva kaama taina kaiqara varaarira vaiintivama variainarara ti, vira vatatena entaraqaahai kia vira qiata kauhi toqa kaate. Viva Pirisia kauquqihairo Isareri ruaruama nimitaina kaiqara hoqarama taanarove, tiro.

⁶Minti tuvaro nahenti viva vuru nai vaati tiva amiro tiharo, Kotiva atitai vaiintiva te unanaini anitairave. Vira virivano Kotira enseli viri voqaara vaivaro ti haatu itairave. Te kia virara taihairae aniaro? turaro viva kia nai autu ntava timivo.

⁷Viva kia minti tiraitiro, tiriara tiharo, Are vainti taiqama vira qorainti vainti vatatenarave. Raurihara variane. Vira vatatena entaraqaahairo ai maaquvano nai qaqi vaina entara Kotiva kaama taina kaiqara varaqiro vuainarara tira, are kia uainive, vo iha namarive, naane. Kotiva qioqama tai karara kia naane tirave, tiro.

⁸Minti tuvaro Manoaava Nora Kotira aarero tiharo, Mpo, Noravauvo, qaqi kairaro are atitaana vaiintiva qaiqaa orurantero tetanta iainanaini tuvu titanta uva tiva timiraqe tetanta naantiara vatataaina vaintira koqemake raqiki variariraro noruqama vuarire, tiro.

⁹Minti tuvaro Kotiva Manoaava tunte uvaro enseli viva orurantero nahentivano naahoqi vauraqi tuvura. Viva tuvuvaro vira vaativano kia vikantiro mini vaura.

¹⁰Enselivano tuvu ntovaro nahentivano kantero nai vaati tiva amireva oruntero virara tiharo, Ike, viva tuvu vaivo. Ti avuqaa qovaramavi vaiintiva qaiqaa tuvu ntaivo, tiro.

¹¹Minti tuvaro Manoaava himpiro nai naata avata varero, vi vaiintiva vaunaini oruntero vira irero tiharo, Are ti naatantira uva tiaravae variaro? tuvaro viva tiharo, Te maa vikave, tiro.

¹²Minti tuvaro Manoaava vira irero tiharo, Ho ai uvavano vivau vaina entara tetanta nana kaiqae vira umiqaqi virarave? Viva nana kaiqae varaqiro vuanarove? tiro.

¹³Minti tuvaro Noravano atito enseliva nai tiva amiro tiharo, Ai naatavano te tiva tauna uvara iriqiro vuarire.

¹⁴Viva uaini tava kia naarire. Viva uainive, vo iha namarive, Kotiva qioqama tai kararave, kia naarire. Viva ekaa uva te vira tiva amunara avataqiro vuarire, tiro.

¹⁵Minti tuvaro Manoaava Noravano atito enselirara tiharo, Ho kia vuane. Are qaqi kairaqe tetanta memeraa naati vo ai unta amiare, tiro.

¹⁶Viva Noravano atito enselira vataakero uva ti vaurara kia kankomakero iruvaro enselivano virara tiharo, Te maini variarera, te kia ai kara narerave. Are vi karara qerama vatairera, Nora Kotira vi ofaara iha quara amitaane, tiro.

¹⁷Minti tuvaro Manoaava Noravano atito enselirara tiharo, Ho nena autu ntairaqe tetanta are tiana uvava qovaraiqiaina entara ai autu tuahera kaare, tuvaro

¹⁸viva tiharo, Nantivarae ti hutuara iraaro? Ti hutu voqaraa autu vairara tira, are kia ho virara kankomakera irinarave, tiro.

¹⁹Minti tuvaro Manoaava ofaa autireva iharo, memeraa naati vo varakero, uiti vonavuvata varero, Nora Kotira nora oriqaa iha quara amitora. Ho Manoaava nai naatantiro tave vauvaro Noravano Kotiva aahuva kaiqa vara nimitora.

²⁰Vitanta tave vauvaro ihavano voqamakero iteharo auru vakaa vakaa i vauvaro Noravano atito enseliva ihaqira naaruvaini vura. Manoaava nai naatantiro vira tave, vitanta vataini hiqintivi naitanta viri vataini ke vaura.

²¹Manoaara aato kenko tuvaro irivuvaro vi vaiintiva Noravano atito enseliva vaura. Ho enseli viva kia qaiqaavata vitanta avuqaa qovarama vura.

²²Manoaava nai naatara tiharo, Oho, tetanta variqa vo tavaunara kaara qutuma virarave, tuvaro

²³vira naatavano aqao tiro, Noravano Kotiva titanta arukareva itirio, viva tetanta ofaa iha quara amitaunara kia varero nai nora kaiqavata kiama titanta humiqaitirio. Viva kiama tiriara are qorainti vainti vatenarave titirio, tura.

²⁴Ho nahenti viva variro qorainti vainti vatatero vira autu nteharo Samsonirave tura. Vi vaintiva noruqama vuvaro Noravano Kotiva vira koqema amite vaura.