Pwovèb 3:4-10

⁴Si ou fè sa, Bondye va kontan avè ou, lèzòm va nonmen non ou an byen.

⁵Mete tout konfyans ou nan Seyè a. Pa gade sou sa ou konnen.

⁶Toujou chonje Seyè a nan tou sa w'ap fè. Li menm, l'a moutre ou chemen pou ou pran.

⁷Pa mete nan tèt ou ou gen plis konprann pase sa. Gen krentif pou Seyè a, refize fè sa ki mal.

⁸Lè ou fè sa, se va tankou yon bon medikaman: W'a toujou gaya, ou p'ap janm soufri doulè.

⁹Fè wè jan ou gen respè pou Seyè a: ba li nan tou sa ou genyen, ofri l' premye donn ou rekòlte nan jaden ou.

¹⁰Lè ou fè sa, galata ou ap toujou chaje danre. Barik diven ou yo ap plen ra bouch.