Psalms 94:16-23

¹⁶Mini’ e sak’iy ni pa’ag nge togopluw ko pi’in kireb? Mini’ e mang ngog ngug togopluwgow ngak e pi’in ma rin’ e kireb?

¹⁷Fa’an mang e de ayuwegneg SOMOL, ma kug wan ni papey ko fare binaw nib math gulngay riy.

¹⁸Mug ga’ar, “Ke sirgig eg”; machane SOMOL fare t’ufeg rom ni dabimus e ke duwgiliyeg.

¹⁹Yu ngiyal’ ni der paslagan’ug ma ke magafan’ug, ma ga fal’eg lanin’ug nggu felan’.

²⁰Dabiyag ni ngam mang ngak e pi tayugang’ ni sasalap, ni yad ma uneg e tin nde mat’aw ngalan e motochiyel,

²¹pi’in yad ma makath nib togopluw ngak e pi’in ni bfel’ miyad turguy ni ngan thang e fan rok e pi’in bfel’ e rok.

²²Machane SOMOL e n’ufegeg; Got rog e be yoror rog.

²³Bayi gechig nagrad ko kireb rorad me thang owcharad ni bochan e denen rorad; I SOMOL ni Got rodad e bayi thirifrad u but’.