Psalms 89:19-44

¹⁹Kakrom e mu dag u daken e thin rom ngak e pi tapigpig rom nib yul’yul’ ni lungum, “Ku gu te’eliyawnag ba salthaw nib gilbugwan, ku gu pi’ e chiya’ ko pilung ngak be’ ni gag e ku gu mel’eg u fithik’ e girdi’.

²⁰Ku gu pilungnag David ni tapigpig rog ku gu gapgepnag ko gapgep ni thothup.

²¹Gelngig e bay i par rok ni gubin ngiyal’, gelngig e bayi pi’ gelngin nge gel.

²²Pi to’ogor rok e ri dabiyag rorad ni ngar ban niged, pi’in kireb e dabiyag ni ni ngar gelgad ngak.

²³Bay gu pirdi’iy e pi to’ogor rok u p’eowchen, mu gu thang e pogofan rok urngin e pi’in yad be fanenikay.

²⁴Bay gu t’ufeg mu gu yul’yul’ ngak; bay gu tay ngi i gel ni gubin ngiyal’.

²⁵Bay gu ga’nag e gin nge gagiyeg riy ni tabab ko day’ ni Mediterranean nge yan i thang ko lul’ ni Eufrates.

²⁶Bayi ga’ar ngog, ‘I gur e chitamag nge Got rog; gur e yoror nge ta’ayuw rog.’

²⁷Bay gu tay ni ir e bin nganni’ i fakag, me ir e th’abi ga’ u fithik’ urngin e pilung.

²⁸Gubin ngiyal’ ni bay gu tay u gil’ e n’en kug micheg ngak, ma m’ag ni kug ngongliy u thilmow e bayi par ni dariy n’umngin nap’an.

²⁹Pi’in owchen e gubin ngiyal’ ni yad e bay ur pilunggad; gagiyeg rok e bayi par ndabi m’ay ni bod lanelang ni bay i par.

³⁰“Machane fa’anra dabi fol e pi’in owchen ko motochiyel rog, ma darir ngongolgad nrogon ni be yog e pi motochiyel rog,

³¹miyad pi’ keru’rad ko fonow ni gu be tay ngorad, ma darir folgad ko tin kugog ngorad ni ngar rin’ed,

³²ma aram e bay gu gechig nagrad ni bochan e denen rorad; bay gu pagrad ngar gafgowgad ni bochan e kireb rorad.

³³Machane David e bay i par nib t’uf rog, dariy bangiyal’ ni gu ra pag e tin ku gu micheg ngak.

³⁴Dab gu th’ab e m’ag ni ku gu ngongliy u thilmow, ara gu thilyeg ta’abbug fapi thin ni ku gu micheg ngak.

³⁵“Ri ta’ab yay ni kug micheg nga fithingag nib thothup ma bay i par riy ni aram rogon, ya ri dab gu lifith l’ugunag ngak David bi’id!

³⁶Gubin ngiyal’ ni bayi par ni bay e gird’ ni owchen, ma bay ug matanagiy gil’ilungun u n’umngin nap’an ni bay e yal’ ni be mat ram’en.

³⁷Bay i par ndabi m’ay ni bod e pul, bayi par nib mudugil u n’umngin nap’an ni be par lanelang.”

³⁸Machane ka mu damumuw ngak fare pilung ni gur e mu mel’eg; ya kamn’ag ni kam pi’ keru’um ngak.

³⁹Kam thang e m’ag ni mu ngongliy u thilmew fare tapigpig rom, ma ka m’on e te’eliyaw ko pilung rok nga marungdu’.

⁴⁰Kam buthug e yoror nib liyeg e binaw rok, pi yoror rok ni fan ko mael e kam digey nib puth.

⁴¹Urngin e girdi’ ni be yib u to’oben nge yan e yad be iring e chugum rok; ma urngin e pi’in yad bbuguliyoror e yad be moning ngak.

⁴²Kam gagiyegnag e pi to’ogor rok kar gelgad ngak; ka mu gagiyeg nagrad ni yad gubin kar fefelan’gad.

⁴³Kam m’aynag fan talin e cham rok, kam pag ke waer ko mael.

⁴⁴Kam chuweg e sog ko pilung u pa’ ma tagil’ ni tagil’ e pilung e kam thikiy nga but’.