Psalms 68:18-35

¹⁸Me yan ngalang ko gin nth’abi tolang, nike fek e pi’in ni kolrad me pi’ e pi tatogopluw e tow’ath ngak, I SOMOL ni Got e ra par u rom.

¹⁹Ngan pining e sorok ngak SOMOL, nma fek e gilab rodad u reb e rran ngu reb; ir fare Got ni ta’ayuw rodad.

²⁰Got rodad e ba Got nma thapegey; ir e SOMOL, ni Somol rodad, nma lagdad ko yam’.

²¹Got e rra bilig lolugen e pi to’ogor rok, ni pi’in darir paged wo’rad ni kireb.

²²Ke ga’ar Somol, “Bay gu fulweg e pi to’ogor rom u Bashan; Bay gu fulwegrad u t’ay e rigur,

²³ya nge yag nim marod u fithik’ e racha’ rorad, me lil’ e pilis romed urngin e racha’ ni yad ba’adag.”

²⁴A Got, yigo’ kan guy fare thelap rom nike sul ko mael nike gel, ni aram fare thelap rok Got, ni pilung rog, ni be yan ngalan tagil’ nib thothup.

²⁵Pi girdi’en e tang e yad bay nga m’on, ma girdi’en e musik nga tomur, ma pi’in rugod e yad bay u lukngun ni yad be chubeg e tambourine.

²⁶“Ngan pining e sorok ngak Got u lane mu’ulung ko girdi’ rok; mu pininged e sorok ngak SOMOL, gimed gubin e pi’in owchen Jakob!”

²⁷Benjamin ni ir e bin th’abi achig e ganong, e m’on nra yib, me migid e pi tayugang’ rok Judah nib mu’un e ulung rorad ngorad, me lay e pi tayugang’ rok Zebulun nge Naftali.

²⁸A Got, mu dag gelngim, ni fare gelngin ni kam ayuwegmad ngay

²⁹ko fare Tempel rom u lan yu Jerusalem, ko gin ra fek e pilung e tow’ath rom ngom i yib ngay.

³⁰Mu puwan’ ngak Egypt, fare gamanman ni malboch nu fithik’ e ra’uy; mu puwan’ ko pi nam, fa ran’ i garbaw ni pumo’on nge pifakrad; nge taw ko ngiyal’ ni go’ kar siro’gad ngom ngar pi’ed e silber rorad ngom. Mu werwereg e pi’in ba’adag e mael!

³¹Pi owchen reb e nam nga reb e bay rabad u Egypt; piyu Ethiopia e bay ra tininged pa’rad ngalang ngar meybilgad ngak Got.

³²Mu tang niged Got, gimed e pi gagiyeg nu fayleng, mon’ed e tangin e sorok ngak Somol,

³³ko en nma yan u lanelang, fare lanelang ni kakrom. Mmotoyilgad ngak ni be tolul nrib ga’ laman.

³⁴Mu weliyed gelngin Got; bugwan nib pilung e ke tharay yu Israel, gelngin e bay u lanelang.

³⁵Ri ra ngat’ ngak Got nike yib u tagil’ nib thothup — fare Got rok yu Israel! Ma pi’ gelngin ngak e girdi’ rok. Ke sorok Got!