Psalms 65:4-11

⁴Ba felan’ e pi’in ni kam mel’egrad, ni kam fekrad ni ngar pired u lan e naun rom nib thothup! Bayi gaman u wun’mad e pin’en ni bfel’ ni bay ko naun rom, ni aram fare Tempel rom nib thothup!

⁵Taban e meybil romed ni ga ma fulweg e gel ni gamad ma tay ko mael, ga be rin’ bogi ban’en ni yira ngat ngay nga mu ayuwegmad. Girdi’ u gubin yang u fayleng, nge girdi’ ni yad mmal’af nga ba’nem e pi regur e gur e pagan’ rorad.

⁶Kam tay e pi burey nga tagil’rad u daken gelngim, ni ga be dag gelngim nib gel.

⁷Ga ma mocha’nag e day nike cham, nge lingan e n’ew ni be pil; ma ga ma gapasnag e wagey ni be tay e girdi’.

⁸Ke ngat e fayleng ni polo’ ni bochan e pi maang’ang ni ka mu ngongliy. Ngongol rom e yi be garusnag ko felfelan’ u baraba’ e fayleng nge mada’ nga baraba’.

⁹Ga be dag ni ga be ayuweg e but’ ko n’uw ni ga be pi’; ga be fal’eg rogon be par nib yong’ol. Ka mu suguy e pi lul’ ko ran; ga be pi’ e woldug ko but’. Irera’ rogon ni ka mu rin’:

¹⁰ga be pu’og e n’uw nga daken e pi flang ni kan gi’ e but’ riy, ga be tarannag; ga be munguynag e but’ ko n’uw ni ga be pi’ be dammalnag e woldug.

¹¹Ga be gagiyegnag be yib e ggan ko woldug ni pire’ ni bochan e gab gol! Gubin yang ni ga ra yan riy ma be yo’or ban’en riy!