Psalms 40:1-12

¹Gu son gu sonnag e ayuw rok SOMOL; me motoyil ngog me rung’ag lamag ni gu be wenig ngak ni nge ayuwegneg.

²Me girngiyeg ngalang nggu chuw u lan ba low u thathren e riya’, nib low u fithik’ e rungdu’! Nge teg nga daken ba war nggu par ndabki buch ban’en rog.

³Me fil ba tang nib be’ech ngog, nib tang ni yibe pining e magaer ngak e Got rodad. Pire’ e girdi’ ni bay ra guyed e ren’ey me yib madgun SOMOL u wun’rad me par ni SOMOL e yad be toer ngak.

⁴Ba felfelan’ e en ni SOMOL e be toer ngak, ma dar cheal nge toer ngak e pi liyos, ara un ko meybil rok e pi’in yad ma tayfan e pi got ni go’ bogi ban’en.

⁵SOMOL ni Got rog, pire’ ban’en ni yira ngat ngay ni kam ngongliy ni fan ngomad; dariy be’ ni bod gur! Bo’or ban’en ni bfel’ nike m’ay i leamnag rom ni fan ngomad. Dabyag ni gu ra weliy ni gubin, ya kayigi pire’.

⁶Gathi gamanman ni maligach nge pin’en ni yima pi’ ngom e ir e ga ba’adag; fa gamanman ni ka ni urfiy nib polo u daken e altar, ara pi maligach ni nge chuweg e denen. Ya ka mu pi’ telig ni nggu rung’ag e thin rom ngay,

⁷ere kug fulweg nike lungug, “Gub aray; tin kamog ni nggu rin e bay u lan e babyor ko Motochiyel rom.

⁸Got rog, ri gu ba’adag ni nggu rin’ e tin nib m’agan’um ngay! Thin rom e be par u fithik’ i lanin’ug.”

⁹SOMOL, kugog fare bugithin ni bfel’ ni murung’agem ni gur e mmat’aw nagmad ngom, ni kug weliy u lan e mu’ulung rok urngin e tirom e girdi’. Ga manang ndab gu tal i weliy.

¹⁰Murung’agem nrayag ni ngam mat’awnag e girdi’ ngom e dagu tay rog ni go’ gag e nggu nang; gubin ngiyal’ ni gu ma weliy fanam yul’yul’ nge ayuw ni gama pi’. Dawor gu th’ab gulungag u lan e mu’ulung rok urngin e girdi’ rom ni gu be weliy murung’agen fanam yul’yul’ nge t’ufeg rom ni dabimus.

¹¹SOMOL, gu manang ndabiyag ni ngam tal ni nge dab kum runguyeg! Gelngin nib t’uf e girdi’ rom nge fanam yul’yul’ e bay i yororiyeg ni gubin ngiyal’.

¹²Kug par nga fithik’ e oloboch ni pire’, ndabkiyag i the’eg! Denen rog e ke ingeg, da ku gur guy ban’en; ke pire’ nga piyan lolugeg, ma kug par nike mulan’ug.