Psalms 37:3-31

³Um par ni SOMOL e ke pagan’um ngak ma ga rin’ e tin ni bfel’; mu’um par u daken e nam rom u fithik’ e gapas.

⁴Mu gay e felfelan’ rom rok SOMOL, me pi’ ngom e tin ir e kari t’uf rom.

⁵Mu pi’em ngak SOMOL; mu pagan’um ngak, me ayuwegnem;

⁶me gagiyegnag pangim nib mat’aw nge gal ni bod ram’en e yal’ ni misiw’.

⁷Mu gum’an ngam sonnag SOMOL ni ir e nge maruwel; dabi awan’um ngak e pi’in ke yo’or ban’en rorad, ara pi’in kefel’ rograd ni bochan e sasalap.

⁸Dab mu pagem nge magafan’um ara mu damumuw; ya kemus ni oloboch e ra yib riy.

⁹Pi’in nib pagan’rad ngak SOMOL e yad ra tafnay e nam, ma pi’in kireb e bay ni tulufrad nga wuru’ e nam.

¹⁰Dabki n’uw nap’an me chuw e pi’in kireb; ra mu gayrad, ma dab mu piri’egrad;

¹¹machane pi’in ba sobut’anrad e bay ra pired u daken e nam, nge felan’rad nike yo’or ban’en rorad ma yad ba gapas.

¹²En nib kireb e ma makath nib togopluw ngak e en ni bfel’, ni be gatfiy lan mit ngak u fithik’ e fanenikan.

¹³Ma SOMOL e be minmin u wan’ ngak e en nib kireb, ya manang ndabki n’uw nap’an me math e fan rok.

¹⁴Pi’in kireb e kar girngiyed e saydon nge gating rorad ni ngar li’ed e pi’in gafgow nge pi’in dariy ban’en rorad, miyad thang e fan rok e pi’in yad bfel’;

¹⁵machane saydon rorad e ir e bay nli’rad ngay, min t’et’ar e gat’ing rorad.

¹⁶Chu’uw ni bay rok be’ ni bfel’ e kabfel’ boch ko machaf rok urngin e pi’in kireb;

¹⁷ya SOMOL e bayi chuweg gelngin e pi’in kireb, machane me yoror rok e pi’in bfel’.

¹⁸I SOMOL e ma ayuweg e pi’in yad be fol rok, ma binaw e bayi par ni taferad ndariy n’umngin nap’an.

¹⁹Mra yib e gafgow nga daken e nam ma dab ra gafgowgad; ra yib e uyongol ma ba gaman e ggan rorad.

²⁰Ma pi’in kireb e yad ra yim’; pi to’ogor rok SOMOL e yad ra chuw ni bod e floras u fithik’ e pan; bay rm’aygad ngabang ni bod e ath.

²¹En nib kireb e ma ning ni ku ra fulweg, machane der ma fulweg, ma en ni bfel’ e ba gol ma de si’in.

²²Pi’in ke fal’eg Got wa’athrad e bay rtafned e binaw, machane pi’in ke bucheg wa’athrad e bay ntulufrad nga wuru’ e binaw.

²³I SOMOL e ma pow’iy be’ ngi i yan ko kanawo’ ni nge yan riy, ma be yororiy e en ni bfel’ u wan’.

²⁴Ra chey ni dol’, ma dabi magach u but’, ya SOMOL e ra ayuweg nge sak’iy ngalang.

²⁵U gu moy ni ku gub pagel, ma chiney e ku gu pilibthir; ma dawor gguy be’ nib mat’aw nike n’ag SOMOL, ara gguy pifak ni yad be man ggan.

²⁶Gubin ngiyal’ nib gol ngak e girdi’, ma yira ning ban’en ngak ni ku yira fulweg me pi’, ma pifak e ma fel’ rogoy u puluwrad.

²⁷Mu pithigem ko kireb ngam rin’ e tin bfel’, ma pi’in owchem e gubin ngiyal’ ni yad e bay ra pired u daken fare gi but’.

²⁸Ya SOMOL e ba t’uf rok e tin bmat’aw, ma der ma n’ag girdi’en; ma yoror rorad ni dariy n’umngin nap’an’, ma pi’in owchen e girdi’ nib kireb e bay ni tulufrad ngar chuwgad u daken fare but’.

²⁹Pi’in yad mmat’aw e bay ra pired u daken fare but’, me par ni taferad ni dariy n’umngin nap’an.

³⁰Thin rok be’ ni bfel’ e bay e gonop riy, ma tin ma weliy e bmat’aw.

³¹Ma tay e motochiyel rok e Got rok u laniyan’, ma dariy e ngiyal’ ni yow ma puf.