Psalms 37:25-38

²⁵U gu moy ni ku gub pagel, ma chiney e ku gu pilibthir; ma dawor gguy be’ nib mat’aw nike n’ag SOMOL, ara gguy pifak ni yad be man ggan.

²⁶Gubin ngiyal’ nib gol ngak e girdi’, ma yira ning ban’en ngak ni ku yira fulweg me pi’, ma pifak e ma fel’ rogoy u puluwrad.

²⁷Mu pithigem ko kireb ngam rin’ e tin bfel’, ma pi’in owchem e gubin ngiyal’ ni yad e bay ra pired u daken fare gi but’.

²⁸Ya SOMOL e ba t’uf rok e tin bmat’aw, ma der ma n’ag girdi’en; ma yoror rorad ni dariy n’umngin nap’an’, ma pi’in owchen e girdi’ nib kireb e bay ni tulufrad ngar chuwgad u daken fare but’.

²⁹Pi’in yad mmat’aw e bay ra pired u daken fare but’, me par ni taferad ni dariy n’umngin nap’an.

³⁰Thin rok be’ ni bfel’ e bay e gonop riy, ma tin ma weliy e bmat’aw.

³¹Ma tay e motochiyel rok e Got rok u laniyan’, ma dariy e ngiyal’ ni yow ma puf.

³²En nib kireb e ma yip’ owchen ngak e en ni bfel’, ni be guy rogon ni nge thang e fan rok;

³³machane SOMOL e dabi pag fa’anem ni bfel’ nga pa’ fa’anem nib kireb, ara pag fa’anem ni bfel’ u gil’ e pufthin nge m’ing e thin nga daken ni nga ni gechignag.

³⁴Mpar ni SOMOL e ke l’agan’um ngak mu’um fol ko tin keyog; me tolang nigem ngam tafnay e binaw, ma bay mu guy e pi’in kireb ni kan tulufrad.

³⁵Kug guy be’ nib kireb nib gel e gafgow ni i tay ngak e girdi’; i changar nga but’ nga daken gubin e girdi’, ni bod ba ke gek’iy nu Lebanon ni cedar;

³⁶ma bayay ni gu wan u rom, ma daki moy; mu gu changarnag, ma da gu pir’eg.

³⁷Mu tay fanamyan ko en dariy thibngin, ma ga yaliy e en nib yal’uw; be’ ni ba gapas e ra yib e pi’in owchen.

³⁸Ma pi tadenen e yira thangrad, min thirif e pi’in owcherad u but’.