Text copied!
CopyCompare
Bible Ni Thothup - Psalms - Psalms 22

Psalms 22:7-30

Help us?
Click on verse(s) to share them!
7Urngin e girdi’ ni yad ra guyeg miyad moning nigeg; miyad pi’ bolowthrad nga tamilang ngar chingchingeged lolugrad ngog me lungurad,
8“Kam gif ngak SOMOL, ere mang ndabi ayuwegnem? Fa’anra ga bfel’ u wan’ SOMOL, me ere mang ndabi ayuwegnem?”
9I gur e mu gagiyegnag ni nga ni gargel nigeg ni bfel’ rogog, ma nap’an ni ku gub ran ma ga yoror rog nde buch ban’en rog.
10Kug par ni gu be toer ngom ni ka nap’an e ngiyal’ nni gargel nigeg riy; ma ka aram nap’an i yib ni ga be par ni gur e Got rog.
11Dab mu par u orel rog! Ya ke chugur e oloboch, ma dariy be’ nra ayuw.
12Pire’ e to’ogor ni ka ra yin’edgag nga longob ni yad bod e garbaw ni pumo’on, go’ ka ra liyegedgag, ni bod fapi garbaw ni pumo’on ndamumuw nu Bashan.
13Kar faled l’ugunrad ni bod e pi layon, ni yad be tolul’ ma yad be k’adeg.
14Ma kem’ay gelngig, ni bod e ran ni map’ nga daken e but’. Urngin e yil ko ul ul u dowag nike thil; ma gumircha’eg e bod ba kendel nike ranran.
15Ke mlik’ lan l’ugunag ni bod feni mlik’ e ab, ma bolowtheg e ke gabal ngalan e goy u l’ugnag kam pageg u fithik’ e fiyath ni ngum’.
16Baraba’ i girdi’ ni yad ba kireb e kar longobiyed gag; ni bod ba ran’ i pilis, ni yad be chugur i yib ngog; yad be girengiy pa’ag nge eg.
17Urngin e yil u dowag nike m’ug, pi to’ogor rog e yad be changar ngog ni kar lik’athgad.
18Kar f’othed rorad e mad rog, ma ka ra girngiyed e pow ni nge duwgil e arorad ni nge fanay e mad rog.
19A SOMOL, dab mu par u orel rog! Mu gur nigem ngam ayuwegneg!
20Mu yororiyeg ko saydon; ma ga ayuweg e pogofan rog ko pi pilis ney.
21Mu lageg u pa’ e pi layon ney; dabiyag ni gu ayuwegneg ko pi garbaw ni malboch ney.
22Bay gu weliy ngak e tirog e girdi’ e n’en kam rin’; bay gu pining e sorok ngom u lan e mu’ulung rorad:
23“Mu pininged e sorok ngak, gimed e pi tapigpig rok SOMOL! Mi gimed gilnag buguwan, gimed e pi’in ni owchen Jakob! Mi gimed liyor ngak, gimed e girdi’ nu Israel!
24Der ma fek owchen rok e pi’in dariy ban’en rorad ara sabalbalyang ko pi gafgow rorad; der ma par u orel rorad, mma rung’ag lamrad e ngiyal ni yad ra man ayuw.”
25Ra sug e girdi’ ngalan tafen e mu’ulung ma gu ra pining e sorok ngom ko tin kam rin’; ma fithik’ e pi’in yad ma liyor ngom e bay gu pi’ e pi maligach riy ni bod rogon ni gu micheg.
26Pi’in ndariy ban’en rorad e yad ra kay urngin e tin yad ba’adag; pi’in yad be yib ngak SOMOL e bay ra pininged e sorok ngak. Manga yu gur pired ni bfel’ rogorad ndariy n’umngin nap’an!
27Gubin e nam ni bay ra leam niged SOMOL. Gubin yang u roy u fayleng ni bay ra sulod ngak; gubin e girdi’ nu fayleng ni bay ra liyorgad ngak.
28Ya SOMOL e ir e pilung, me ir e be gagiyegnag urngin e nam.
29Urngin e girdi’ nib tolangan’rad e yad ra siro’ ngak, ma gubin e pi’in yad ra yim’ ni bay ra siro’gad u p’eowchen,
30pi mfen ni bay rabad e bay ra pigpiggad ngak; girdi’ e bay ra weliyed murung’agen SOMOL ngak e tin bay yib e mfen.

Read Psalms 22Psalms 22
Compare Psalms 22:7-30Psalms 22:7-30