Psalms 119:36-124

³⁶Mu pi’ chogowen ngog ni nggu fol ko pi motochiyel rom ma gathi nge yo’or ban’en rog.

³⁷Mu talegneg ni dabki lagan’ug ko n’en ndariy gam’ingin; mu gol ngog, ni bod nim micheg.

³⁸Mu tay u gil’ e n’en nim micheg ngog, I gag e tapigpig rom, ni fare michmich ni mu tay ko pi’in yad ma fol rom.

³⁹Mu ayuwegneg ko thin ni kireb ni gu ma rus ngay; rib fel’ e pin’en ni ka mu tiriggiliy.

⁴⁰Gu ba’adag ni nggu fol ko tin kamog ni ngan rin’; mu pi’ e yafos nib be’ech ngog, ni fan e gab mat’aw.

⁴¹SOMOL, mu dag ngog gelngin ni gub t’uf rom, ma ga aywegeg nrogon nim micheg.

⁴²Ma aram e rayag ni nggu fulweg lungun e pi’in yad be gar nigeg ni bochan e bpagan’ug ko thin rom.

⁴³Mu pi’ gelngig ni tin riyul’ e ngi i yib u langag ni gubin ngiyal’, ni bochan e be lagan’ug ko tin ka mu tiriggiliy.

⁴⁴Bay ug fol ni gubin ngiyal’ ko motochiyel rom, ni manechibog ko pichibog.

⁴⁵Bay gu par ni rib puf rogog, ni bochan e gu ma athamagiliy ni nggu fol ko pi machib rom.

⁴⁶Bay gu weliy e tin kamog ni ngan rin’ ko pi pilung ni dab gu tamra ngay.

⁴⁷Ku gu pir’eg e felfelan’ u fithik’ e fol ni gu be tay ko tin kamog ni ngan rin’, ni bochan e rib t’uf rog e tin kamog.

⁴⁸Gu ma tay fan ma ba t’uf rog e pi motochiyel rom; bay ug leamleamnag e pi fanow rom.

⁴⁹Mu leamnag e michmich ni mu tay ngog, I gag e tapigpig rom; ya ke pi’ e lagan’ ngog.

⁵⁰Mus u fithik’ e gafgow rog mab aw e gapas u lanin’ug ni bochan e n’en ni mmicheg e ke pi’ e yafos ngog.

⁵¹Pi tolngan’ e gubin ngiyal’ ni yad ma moning nigeg, machane dawor gu digey e motochiyel rom.

⁵²Ke yib woran ngan’ug e tin mu tiriggiliy kakrom, nma pi’ e pagan’ ngog, A SOMOL.

⁵³Nap’an ni gu ra guy e pi’in kireb ni th’ab e motochiyel rom, mu gu sug ko damumuw.

⁵⁴Nap’an e par rog u roy u fayleng nib ngoch nap’an e gu be tunguy e pi tang ni murung’agen e tin kamog ni ngan rin’.

⁵⁵A SOMOL, ra nep’ mu gu leam nigem, mu ug leamnag murung’agen e motochiyel rom.

⁵⁶Gu ma pir’eg e felfelan’ rog ni gu ma fol ko tin kamog ni ngan rin’.

⁵⁷A SOMOL, urngin e tin bt’uf rog e gur; ku gu micheg ni nggu fol ko motochiyel rom.

⁵⁸Gu be ning ngom u polo’ i lanin’ug ni nge wurengan’um ngog, ni bod nim micheg.

⁵⁹Kug leamnag rogon pangig, ma ku gu micheg ni nggu falwok ko pi fanow rom.

⁶⁰Yug nap’an ni ga ra non mu gu rin’ e n’en kamog.

⁶¹Pi’in kireb e yad ma tay e wup ni fan ngog, machane dagur pagtilin e motochiyel rom.

⁶²Ra lukngun e nep’ mu gu od nggu pining e sorok ngom nga feni mat’aw rogon e pi tiriggil rom.

⁶³I gag e fager rok urngin e pi’in yad ma pigpig ngom, ni gubin e pi’in yad ma fol ko pi motochiyel rom.

⁶⁴SOMOL, fayleng e ke sugnag e t’ufeg rom ni dabimus; mu fil ngog e pi motochiyel rom.

⁶⁵SOMOL, michmich rom e kam tay u gil’, ma gab gol ngog, I gag e tapigpig rom.

⁶⁶Mu pi’ ngog e gonop nge llowan’, ni bochan e ba pagan’ug ko tin kam ta’chiylen.

⁶⁷Ug denen ko ngiyal’ ni dawor mu gechig nageg, ma chiney e gu be fol ko thin rom.

⁶⁸Rigab manigil — ma gab gol! Mu fil ngog e tin kamog ni ngan rin’.

⁶⁹Pi’in tolngan’ e yad be ban u murung’ageg machane gu be fol ko fanow rom u polo’ i lanin’ug.

⁷⁰Pi cha’ney e dariy ban’en ni yad manang fan, machane gag e gu be pir’eg e felfelan’ u lan e motochiyel rom.

⁷¹Gechig rog e ba manigil ngog, ya ke yag ni gu fil riy e tin kamog ni ngan rin’.

⁷²Fare mmotochiyel ni mu pi’ ngog e ba ga’ fan u lanin’ug ko urngin e salpiy u lan e re fayleng ney.

⁷³I gur e mu sunmiyeg, ma ga aywegeg ni de buch ban’en rog; mu pi’ ngog e tamilngan’, ya nge yag ni mit ngog e pi motochiyel rom.

⁷⁴Picha’ ni yad ma liyor ngom e yad ra guyeg ma yad ma felan’, ni bochan e ma pagan’ug ko n’en nim micheg.

⁷⁵SOMOL, gumnang ni tiriggil rom e go’ bmat’aw, ma ka mu gechig nigeg ni bochan e ga ba yul’yul’.

⁷⁶Mu pag e t’ufeg rom ni dabimus nge fal’eg lanin’ug, ni bod nim micheg ngog, I gag e tapigpig rom.

⁷⁷Mu rungyeg, mu gu par ni gub fos ni bochan e ke yag e felfelan’ ngog ko motochiyel rom.

⁷⁸Mang e yigi tamra’ e pi’in tolngan’ ko thin ni ur tar’ed nga dakenag; ma gag, e bay gu par ngu’ug leamnag e pi fanow rom.

⁷⁹Mang e yigi yib e pi’in yad ma liyor ngom ngog — ni gubin e pi’in manang e tin ka mu ta’chiylen.

⁸⁰Mang e yigi fel’ rogon ni ngu’ug fol ko pi motochiyel rom ya nge dab gu tamra’ ko me’waer rog.

⁸¹SOMOL, ke aw parwog ni gu be son nagem ni ngam ayuwegneg; ku gu tay e pagan’ rog ko thin rom.

⁸²Lan owcheg e ke magaf i changarnag e n’en kam micheg, ni gu be fith ni gu be ga’ar, “Wi’in e ga ra aywegeg?”

⁸³Dakriy ban’en ni gu bfel’ ngay kug bod ba tafen e wayin ni kann’ag; ni yug aram rogon ma dawor gu pagtalin e tin kamog ni ngan rin’.

⁸⁴Uw n’umngin nap’an ni thingar kug son? Mingyal’ e bay mu gechignag e pi’in yad be gafgow nigeg?

⁸⁵Pi’in tolngan’, ni darir folgad ko motochiyel rom, e kar fu’oged e low ni nggu mul nga langgin.

⁸⁶Gubin e motochiyel rom mra pagan’nuy ngay; girdi’ e yad be gafgow nigeg ko sasalap l’ugun — mu ayuwegneg!

⁸⁷Kari chugur ni ngar feked e pogofan rog, machane dawor gu pag e tin kam ta’chiylen.

⁸⁸Mu gol ngog ni bochan e t’ufeg rom ni dabimus, ya nge yag ni gu fol ko motochiyel rom.

⁸⁹SOMOL, thin rom e dariy n’umngin nap’an; ma ba manemus u tharmiy.

⁹⁰Fanam yul’yul’ e ra par manechibog; I gur e mu ayliy e fayleng nga tagil’, me par.

⁹¹Urngin ban’en ma kabay u gil’ ke mada’ ko bin dab’ e rran ni bochan e gur e mog, ma bochan e yad e tapigpig rom ni yad gubin.

⁹²Fa’an manga gathi motochiyel rom e ir e enggin e felfelan’ rog, ma kugum’ nriyul’ u fithik’ e gafgow rog.

⁹³Dab gu pag e fanow rom, ni bochan e ir e ke teg ni gub fos.

⁹⁴Ba milfag ngom — mu aywegeg! Kug guy rogon ni nggu fol ko tin mog ni ngan rin’.

⁹⁵Girdi’ nib kireb e yad be son ni ngar thanged e pogofan rog, machane bay ug leamnag e motochiyel rom.

⁹⁶Kugnang ni urngin ban’en ma bay folen; machane motochiyel rom e dariy thibngin.

⁹⁷Rib t’uf rog e motochiyel rom! Gu ma par ni gu ma leamnag ni polo’ e rran.

⁹⁸Tin kamog ni ngan rin’ e be par u wun’ug ni gubin ngiyal’, be ga’nag e gonop rog ngak e pi to’ogor rog.

⁹⁹Ba gel e tamilangan’ rog ngak urngin e pi sensey rog, ya gu ma leamnag e pi fonow rom.

¹⁰⁰Ka ba ga’ e gonop rog ngak e pi’in kar pi’lalgad, ya gu be fol ko tin kamog ni ngan rin’.

¹⁰¹Kug gilaf ko urngin e ngongol nib kireb, ya gu ba’adag ni nggu fol ko thin rom.

¹⁰²Dawor gu pi’ keru’ug ko fonow rom, ya gur e tamchib rog.

¹⁰³Rib athib lamen e thin rom ni ku gu ri’; kab athib ko honey!

¹⁰⁴Pi motochiyel rom e yagnag e gonop ngog, ma aram mu gu fanenikay urngin e ngongol nib kireb.

¹⁰⁵Thin rom e ba magal ni be pow’iyeg, ma tamilang ko kanawo’ rog.

¹⁰⁶Bay gu tay nga tagil’ e tin ku gu micheg ni ngu’ug fol ko pi fonow rom nrib mat’aw.

¹⁰⁷SOMOL, gafgow rog e rriyul’ nrib gel; mu teg ni gubfos, ni bod ni kam micheg!

¹⁰⁸A SOMOL, nge fel’ u wun’um e meybil rog ni gu be pining e magaer ngom, ma ga fil ngog e tin kamog ni ngan rin’.

¹⁰⁹Ya gubin ngiyal’ ni kug fal’eg rogog kug kol e pogofan rog nga pa’ag; ma motochiyel rom e dawor gu pag talin.

¹¹⁰Girdi’ nib kireb e kar ted e wup ni nggu aw ngay, machane dawor gu pi’ keru’ug ko tin ni kamog ni ngan rin’.

¹¹¹Pi motochiyel rom e fanag ndariy n’umngin nap’an, nma pi’ e felfelan’ ngalan gumircha’eg.

¹¹²Kug duwgiliy u wun’ug ni nggu fol ko pi motochiyel rom, nge mada’ ko rofen ni bay gum’.

¹¹³Gu be fananikay e pi’in der gaman e yul’yul’ ni yad be tay ngom, ya gag e ba t’uf rog e motochiyel rom.

¹¹⁴I gur e manaf rog nge rungrung rog; nike lagan’ug ko n’en kam micheg.

¹¹⁵Gimed e girdi’ ni tadenen, mu pired u palog rog. Ya bay ug fol ko tin ke tay e Got rog chiylen.

¹¹⁶Mu pi’ gelngig, ni bod nim micheg, mu gu par ni gubfos; dab mu pageg nge mulan’ug ko tin ke lagan’ug ngay!

¹¹⁷Mu chubiyeg ngalang, nggu par ni dabi buch ban’en rog, ma gubin ngiyal’ ni bay ug tiyan’ug ko tin kamog ni ngan rin’.

¹¹⁸Ga ma fek owchem rok urngin e pi’in ndarir falwokgad ko motochiyel rom; pi sasaliyab rorad e ba m’ay fan.

¹¹⁹Ga ma tay urngin e pi’in kireb ni bod e dow, aram fan nib t’uf rog e fanow rom.

¹²⁰Gu be rus ni bocham; ma ke sug nigeg e marus ni bochan e pufthin rom.

¹²¹Kug rin’ e n’en ni bfel’ ma ba manigil; dab mu pi’eg nga pa’ e pi to’ogor rog!

¹²²Mmicheg ni ga ra ayweg e tapigpig rom; dab mu pag e pi tolngan’ ngar gafgow nigedgag!

¹²³Ke magaf owcheg i changarnag e ayuw rom, ni fare ayuw nim micheg.

¹²⁴Mu ayuwegneg ni rogon fare t’ufeg rom ni dabimus, ma ga fil ngog e tin kamog ni ngan rin’.