Psalm 86:2-16

²Kom kotin apwali maur i, pwe ngai me lelapok. Maing Kot, kom kotin sauasa ia, sapwilim omui ladu men et, me liki komui.

³Maing, kom kotin maki ong ia, pwe i kin likwir ong komui ni ansau karos.

⁴Kom kotin kaperenda mongiong en sapwilim omui ladu, pwe mongiong i kin anane komui Maing.

⁵Pwe komui Maing me mau o kalangan, o kom kotin kalangan ong ir karos, me kin likwir ong komui.

⁶Maing Ieowa, kom kotin ereki ai kapakap, o kotin mangi ngil en ai ngidingid.

⁷Ni ai apwal akan i kin likwir ong komui, pwe kom, kotin mangi ia!

⁸Maing, sota me dueta komui nan pung en kot akan; o sota me kak wiawia dueta komui.

⁹Men liki kan karos pan pwarado, pwen kaudoki ong komui Maing, o wauneki mar omui.

¹⁰Pwe komui me lapalap, me kin wiada manaman, o komui ta me Kot.

¹¹Maing Ieowa, re kotin kasale ong ia al omui, pwe i en weweid ni omui melel, kom kotin kolekol mongiong i ong iet eta: Masak mar omui.

¹²I men kapinga komui Maing, ai Kot, sang nan mongiong i, o wauneki mar omui kokolata.

¹³Pwe omui kalangan me laud ong ia; komui dore maur i sang nan wasan mela.

¹⁴Maing Kot, me aklapalap akan kin palian ia, o pwin en me weit akan kin masamasan maur i, o re sota kin weweid mon silang omui.

¹⁵A komui Maing Kot, me dir en kalangan, o mak, o kanongama, o omui kapunglol o melel me lapalap.

¹⁶Kom kotin wukidoki dong ia, o maki ong ia, o kamaui kida sapwilim omui ladu omui manaman, o kotin sauasa nain sapwilim omui lidu!