Psalm 69:3-28

³I panga kila ai sangesang, kapin wor ai kirkilar, mas ai suedalar, pwe a warailar ai auiaui Kot.

⁴Me kin tata kin ia nin sokarepa me toto sang pit en mong ai. Me imwintiti ong ia, o me kin kawe ia la, ap sota karepa, kin kelail. I en pwain, me i sota kulia sang.

⁵Maing Kot, kom kotin mangi ai pweipwei, o ai sapung kan me sota rir sang komui.

⁶Kom der mueid ong irail, me auiaui komui, en sarodi pweki ngai, Maing Ieowa Sepaot; kom der mueid ong irail, me rapaki komui, en namenokala pweki ngai, Kot en Israel.

⁷Pwe i kin kankaururla pweki komui, mas ai me dir en namenok.

⁸I wialar men wai amen ren ri ai kan, o nain in ai sasa ia lar.

⁹Pwe limpok ong tanpas omui kasor ia dier, o lalaue en ir, me kin lalaue komui id ko dong ia.

¹⁰I kin sangesang melel o kaisesol, ari so, re kin lalaue ia.

¹¹I likau kidar ed eu, a re kin lalaue ia.

¹²O me mondi pan wanim, kin kasekasenda ia, o wasan kang sakau, re kin kakaul kin ia.

¹³A i kin kapakap ong komui Maing Ieowa ni ansau me kon ong; Maing Kot, kom kotin mangi ia pweki omui kalangan lapalap o kotin sauasa ia.

¹⁴Kotin dore ia la sang nan pwel, pwe i ender kirila; pwe i en piti sang, me kailong kin ia o sang nan pil lol;

¹⁵Pwe lapake ender kamop ia la, o wasa lol ender kadala ia la, o au en por o ender pur pena ong po i.

¹⁶Mangi ia, Maing Ieowa, pwe omui kalangan meid mau, kom kotin masan dong ia, pweki omui kalangan lapalap.

¹⁷O kom der karirela sang sapwilim omui ladu silang omui, pwe i masak; kom kotin madang mangi ia!

¹⁸Kom kotido ren ngen i o dorela i, kotin dore ia la pweki ai imwintiti kan.

¹⁹Komui mangier duen ai sarodier, o ai lisela, o ai namenok, me palian ia, kin sansal ong komui.

²⁰Ai sarodier kin kawela nan mongiong i, o i luetalar melel. I auiaui, ma sota me pan insensuedeki mepukat, a sota man amen; o ma sota, me pan kamait ia la, a sota me i kak diar.

²¹Irail kin kamanga kin ia ede, o kanim pil kin ia pinika ni ai men nim piladar kaualap:

²²Arail tepel en wiala insar arail, o lidip arail, o kapup arail.

²³Mas arail en rotorotala, pwe ren der kilang wasa, o irail en kos pena kokolata.

²⁴Wudokidi ong po ’rail omui ongiong, o omui ongiong melel en lel ong irail.

²⁵Deu ’rail en liselipingda, o sota me pan kauson nan im arail.

²⁶Pwe re kin pakipaki, me kom kotin kaloker, o re kin indinda, me dene komui kin kaloke mal sapwilim omui kan.

²⁷Kom kotin kaloedi ong ir ni sapung toto, pwe ren der konodi omui pung.

²⁸Iris sang ir nan puk en kamaur, pwe ren der iang me pung kan kileledi.