Psalm 37:1-21

¹KOE der makaraki me sued akan; o der peirinki me kin wia sapung.

²Pwe re pan sorala madang dueta rä, o re pan mongedi dueta tan tuka kan.

³Kaporoporeki Ieowa o wiada me mau, kaukausonta nan sap o, o wiawia me pung.

⁴Polauleki Ieowa, a pan kotiki ong uk, me mongion om inong iong.

⁵Mueid ong Ieowa om wiawia kan o kaporoporeki i, a pan kotin wia mau.

⁶A pan kapwareda om wiawia me pung dueta marain, o om tiak pung dueta nin sauas.

⁷Kaporoporeki Ieowa ap nenenla o auiaui, o koe der makar kida pan me kin pwaida ni a wiawia kan, ol o, me kin kapwaiada me sued.

⁸Muei sang makar o pwilikidi om lingarangar; koe der makar, pwe koe der pil wia me sued.

⁹Pwe me sued akan pan kokoka sang, a me liki Ieowa, pan sapaneki sap o.

¹⁰Ansau takis, ap solar me sapung o, o ma koe men kilang deu a, a solar mia.

¹¹A me opampap akan pan sosoki sap o, o re pan pereperen ki ar kapwa toto.

¹²Me sapung o kin kamasak me pung o, o ngi tete ong i.

¹³A Ieowa kotin kiparamateki i, pwe a kotin mangi a ansau.

¹⁴Me sapung kan kin ngape kida kodlas o kaonopada kasik katieu, pwen kasikiedi me luet o samama, o kamela me kekeit wei ni melel.

¹⁵A ar kodlas pan dokodi pein mongiong arail, o ar kasik katieu pan tip pasang.

¹⁶Me malaulau en me pung amen, me mau sang dipisou toto en me sapung kan.

¹⁷Pwe pa en me sapung kan pan tip pasang, a Ieowa pan kotin kolekol me pung kan.

¹⁸Ieowa kotin mangier ran en me lelapok kan, o ar dipisou pan duedueta.

¹⁹Re sota pan namenokala ni ansau apwal, o ni ansaun lek a pan itar ong ir.

²⁰Pwe me sapung kan pan lokidokila, o imwintiti en Ieowa, ma re rasong sap kaselel eu, re pil pan mokonaidi dueta atiniai.

²¹Me sapung kan kin pwaipwand ap sota kapungala, a me pung o kin kadek o kin kisakisa wei.