ZABURA 37:1-21

¹Dauda lɛ̀ɛ. Ǹsun tó gbɛ̃ vãninↄ yã n kũ gbãnaro, ǹsun yãvãnikɛrinↄ gwena ni dɛro,

²zaakũ ò kori kɛ tera lán sɛ̃̀ɛ bàmɛ, ń manakɛna ni láka lán sɛ̃̀la ísi bà.

³Ǹ Dikiri náani kɛ, ǹgↄ̃ yã mana kɛ, ǹgↄ̃ kú bùsu dín, ǹgↄ̃ nna ma.

⁴Ǹ tó n pↄ gↄ̃ nna kũ Dikirio, ani pↄ́ kũ n nɛ̀sɛ yei kpámma.

⁵Ǹ zɛ kũ Dikirio ǹ a náani kɛ, ani yã dínↄ kɛnnɛ.

⁶Ani tó yã bo kũnwo nna lán gudↄnaa bà, ani tó ǹ bo mana lán fãnantɛ̃ gupurakũnaa bà.

⁷Ǹ zɛ kũ mɛnao Dikiri arɛ ǹ a dã, ǹsun tó aruzɛkɛde yã n kũ gbãna gↄrↄ kũ à bò kũ a wɛ́zɛ̃ vãnioro.

⁸Ǹ pↄfɛ̃ tó ǹ mì kɛ̃ pɛ̃tɛ̃a. Ǹsun tó yã birenↄ n kũ gbãnaro, àdi su kũ yãvãnikɛnaaomɛ.

⁹Zaakũ gbɛ̃ vãninↄ ni kakatɛ, gbɛ̃ kũ ń wɛ́ dↄ Dikiriinↄ mɛ́ ògↄ̃ bùsu vĩ.

¹⁰À gↄ̃̀ fíti kũ gbɛ̃ vãninↄ nigↄ̃ kun doro, bee tó n ń wɛ́tɛ, ĩni ń lero.

¹¹Zĩdabusarinↄ mɛ́ onigↄ̃ bùsu vĩ, onigↄ̃ pↄnna kɛ kũ aafia zↄ̃kↄ̃ↄo.

¹²Gbɛ̃ vãni dì yã vãni kpákpa gbɛ̃ mananɛ, àdi sakaa pìtia.

¹³Ama Dikiri dìgↄ̃ a yáa dↄ, zaakũ à dↄ̃ kũ a gↄrↄ ni papa.

¹⁴Gbɛ̃ vãninↄ dì fɛ̃nɛda woto, òdi ń kà kpá sála, de ò le ò takasidenↄ kũ wɛ̃ndadenↄ dɛdɛo, ò gbɛ̃ kũ ń yãkɛna mananↄ kakatɛ.

¹⁵Ń zĩda fɛ̃nɛda ni ń zↄ̃ ń swɛ̃̀n, oni ń sánↄ ɛ́'ɛńnɛ.

¹⁶Pↄ́ fíti kũ gbɛ̃ mana vĩ de gbɛ̃ vãni dasinↄ aruzɛkɛla,

¹⁷zaakũ gbɛ̃ vãninↄ gbãna ni mì dɛ, ama Dikirimɛ gbɛ̃ mananↄ kũna ũ.

¹⁸Dikiri taarisaridenↄ yã dↄ̃, ń bakaa dìgↄ̃ de ń pↄ́ ũ gↄrↄ sĩnda pínki.

¹⁹Wé'i ni ń kũ yã pãsĩ gↄrↄ zĩro, bee tó nàa kà, onigↄ̃ kãna.

²⁰Gbɛ̃ vãninↄ sↄ̃ oni kakatɛ, Dikiri ibɛrɛnↄ ni láka lán sɛ̃̀la bↄ̀tↄↄ bà, ò gɛ̃tɛ lán túsukpɛ bà.

²¹Gbɛ̃ vãni dì pↄ́ sãkãḿma à a fĩna boro, gbɛ̃ mana sↄ̃ àdi gba da yↄ̃nkↄyↄ̃nkↄ.