Psalm 18:30-50

³⁰Al en Kot me unsokala; masan en Ieowa me makelekel. I pere pan karos, me liki i.

³¹Pwe ia amen Kot impan Ieowa, de ia paip eu impan atail Kot?

³²Iei Kot, me kotin aude kin ia manaman, o kaunsokala al ai.

³³A kin kotin wiai ong nä i kan dueta nä en tia, o kotin kasapwil ia dang wasa ileile.

³⁴A kotin padaki ong pa i kan tiak en mauin o, pwen kak ong kaonopada kasik katieu mata.

³⁵Kom kotiki ong ia pere pan maur omui, o lim omui pali maun kamana ia da, o omui opampap me kasapwil ia da.

³⁶Kom kotin kaonopadar al, me i pan weweid ia, pwe nä i kan ender krisedi.

³⁷I pan tang wong ai imwintiti kan o kono irail edi, o i sota pan puredo, lao karos lodier.

³⁸I pan kamor irail pasang, re sota pan kak palian ia, o re pan pupedi ong pan nä i kan.

³⁹Kom kak kamana kin ia omui manaman ong ni pei; Kom kak kasedi ong pan nä i kan karos me palian ia.

⁴⁰Kom kin kotin kaloedi ong ia ai imwintiti kan, pwen kawela, me kailong kin ia.

⁴¹Re kin likelikwir, a sota sauas parail ren Ieowa, a sota kotin sapeng ir.

⁴²I pan suk irail pasang dueta pwel par nan kisiniang; i pan kase ir ala dueta pwel samin sang nani al o.

⁴³Kom kin kotin dore ia sang ren akamai en aramas, o kom kotin kasapwil ia dang men liki kan; o wei eu me i sasa kin upa ong ia.

⁴⁴Ni ar ronger, re peiki ong ia er, o nain men wai kan peikiong ia ni lingkaping.

⁴⁵Nain men wai kan poridier o rerer o pwarado sang nan ar im kalaimun akan.

⁴⁶Ieowa kotin ieias; kaping ong ai paipalap; o kaping ong Kot ai saundor.

⁴⁷Kot me kotin depuk ong ai imwintiti kan, o a kotin kaloedi ong ia ai imwintiti kan;

⁴⁸Kom kotin dore ia la sang ai imwintiti kan, o kom kotin kasapwil ia dang ir, me palian ia. Kom kin kotin sauasa ia ong me morsued ong ia.

⁴⁹I me i men danke komui, Maing Ieowa, nan pung en men liki kan o kauleki duen mar omui,

⁵⁰Komui me kotin kamaurada melel sapwilim a nanmarki o a kotin sauasa mau sapwilim a Dawid keiedier o kadaudok a kokolata.