Psalm 132:7-16

⁷Wanjh ngad ngarriyimeng, “Mah! Wanjh karriray kore Yawey kahni dja karrimarneboddan kore kurrenge nuye!”

⁸Wanjh ngarridi yiwarrudj bu ngarriyimeng, “Ngudda Yawey, wanjh yirrolkka dja yimray kore kunred ke bu yingehme. Dja mak yimyika nawu Ark manbu kanbukkan ngudda ke kundulkarre duninjh.

⁹Ngarridjare mak nawu priests ngudda ke wanjh munguyh djal mandjad kabirrihdjalkurduyime, dja ngudda ke binihbininj wanjh kabirriwayini bu kunnjilngmak dorrengh!”

¹⁰“Yawey, ngudda yimarnewokkurrmerrinj David nawu ngunmarnedurrkmirri, dja yuwn bu yirrahme nahni king nawu yidjarrngbom.

¹¹Ngudda Yawey yiwokkurrmerrinj nuye David, dja minj munguyh yimayaliborledkerren. Ngudda yimarneyimeng, ‘Kaluk ngaye ngakurrme nakudji beywurd ke bu kawohrnan yerre bu ngudda yirrowen.

¹²Bu nawu yibenbornan rowk kabirridjalkarrme kunwok ngardduk kore ngawokkurrmerrinj, dja manbu ngabenbukkabukkan, wanjh nawu yerre kabindibornan, bedman warridj kabirribalwohrnan bu munguyh.’ Kuhni nawu Yawey bimarneyimeng David.”

¹³Nawu Yawey bolkdjarrngbom kukadje Zion dja djareminj bu marnbom kunred nuye kumekbe.

¹⁴Bu nawu Yawey yimeng, “Kondah wanjh ngadjare ngayerrkan bu ngawohrnawohrnan, dja ngadjareni ngani kondah bu munguyh munguyh.

¹⁵Wanjh ngaye ngabolkmarnbun bu kunwern kakarrme njalehnjale, mak nawu birrimarladj kabirrihni wanjh nakka kaluk ngabenworrkmiwon.

¹⁶Nawu priests ngalengngarre Zion, wanjh ngabenmarnbun bu birridjalmak bininj. Dja nawu ngardduk duninjh binihbininj, wanjh ngandimarnekayhme kunnjilngmak dorrengh.”