Proverbs 7:2-26

²Aninga munan den karo tui mu ni te terong la lagerko; nika motam mu mel aromemek se ni ninguru ko sinar tasam iwitatala, aninga den ko ninguru sinar toko.

³Den mu gemang motam ningi bitar, ale kiting sengam te ilupko.

⁴Ikia sinar se ko nunguning mu nika koras agi ka yawara bo iwita ninguru ko kuarko.

⁵Nuna nika bitarmon se lage luan imet agi, kari bo ko imet nunga den welang te me dagulko.

⁶Ani kawam ko kuring gotek te marir tasan mu te loagawa,

⁷kari kulak sang nungarkem, ale nunga ningi bo borara biya, ningo memek kaura tutera mena, mu arigem.

⁸Nu aolak iluwam ale lage tuang imet bo ko kawam duap te namara umu kaoram.

⁹Mu bainga ningi, sor tirom batagam taiwaram se.

¹⁰Se imet umu lage luan imet ko munan te numi nungam, ale den aguwaya te gomang kulukokko mu iki se kote aratam.

¹¹Imet umu numi ira mena, palalak imet, kawam te me dagi kulukuso,

¹²aitak la tuang suen la te, aitak la diara guruga kuwim te, aitak la sor suen la te kari ko loaga gurugu geragawara.

¹³Nu kari kulak mu iluwam yasaram ale kol misikiram, ale diram la maonam ale mam:

¹⁴“Ani aitakta diram mel ningo bo te tama bita tuem, ale ko nukum giem karogo tai kawam te awurem se aniso.

¹⁵Se tairem nika loaga gurugu laga asele aitak karkem!

¹⁶Aninga anira kuwim mu guang bala yawara karogo, Egypt tairam, wore te muru nunguru beterem,

¹⁷ale mel siring yawara yawara, myrrh, aloes, se cinnamon, mu awote warem se aniso.

¹⁸Tair se namanak ale tirom awote ani se kola gusi se laganak la ukirokko.

¹⁹Aninga agari kawam te me bagoso; nu awar biya nunguningkiri namaram.

²⁰Nu manga biya giam ale ago namaram, ewere te se nu tairate me tairukko, sige imi nukum te asele tairukko.”

²¹Nu ko gomang kuluka den mu, se ko den welang yawara umu te kari gomang kuluku lage memek te beteram.

²²Se kari kulak mu tairatela kowom karo ilak namaram; nu bulmakau mora se kuerukko tagi ilak nama kam namaram; ale buruk dagarok ko me ikia, am ngual kasik nagu nama te sorara

²³se gatu te gangarukam iwita namaram; ale aking inangnang binga nama kalilok te sora kam namaram. Kari kulak imi nu kua namarukko lage te namakaso, bare nu kota me ari ko ikikaso.

²⁴Se aga namar, aninga den imi ninguru iki ale karo tuiko!

²⁵Imet uwuta mu ko kiwem me gemang tui ale karo tuiko.

²⁶Mu awuk, imet umu kari suen biya nunga maguwuram se kapa maga sapaman.