Proverbs 30:5-23

⁵“Kaem ko den suen la mu arigiman am nunguning se diram la; awiriya nu kote nagu namasan, mu nu nunga karem se nunga kaluwuso.

⁶Noko den bo me ta ka ikia te kunasirko; mu awuk, nu ining kisok ale ka kawel mu wetang saparukko.

⁷“O Yawe, ani me kua namasam la, ni mel ilagala ani aisuko ka isarsam:

⁸Aga sangaru se den nunguning la balik ale kawel munan mu abiring tuekko; ani aga sangaru se angimik mel ago bagarikko me balsam, agi aga sangaru se angimik mel mena bagarikko me balsam tala, bare aga sangaru se ningo la baga se lagarikko.

⁹Ani mel suen biya ago baga se mu, ni Yawe abiring kisek ale mel yam ko ka balik bore ko; agi angimik mel mena baga se tere naik ale ni aga Kaem nip maguwurik bore ko.

¹⁰“Ura kari bo ko dom koma te me balu maguwurko, mu awuk, ura kari mu bala ikup kimik ko baluk se ni mel umu nunguruko.

¹¹“Kuriang saki nunga nonet bala ikup nunga manorsan, ale nunam alo den amilmil me nunga manorsan.

¹²Kariimet saki nuna nunumi arigisan mu nuna nungumik ikup mena ma balsan, bare nuna memek biya ago bagasan.

¹³Kariimet saki nuna nunumi patawusan ale nomotam kualala kualala la loagasan.

¹⁴Aking kariimet saki mu kausik diwang nogore daong karogo memek iwita, kariimet kituwura nungumik saonga mena mu nunga moa batutumu namonko iwita geragasan.

¹⁵“Mel suen biya ni la bowa tuguma ko munan mu nanawusari ilagala: bo ko nup mu Aisuko, se bo mu ko nup Aisuko tala. Uwutatala, mel 3 agi 4 imi terong mam ma bala me ikisan, bo ago ko bala mu la ikisan:

¹⁶Bo mu kuera mutim, bo mu imet kuin sisira se kuriang ko nia lagoso, bo mu ali garagarayam yu ko nia lagoso, se bo mu tama gigip kumik ira mena. Mel 4 imitang mu terong mam bala me ikisan.

¹⁷“Awiriya nuet ari daleluwuso, agi nuam ngata tuso, mu kari uwuta mu ilak nama sapara se taraga sengkasik mel taimon ale motam kuagi atumu namon ale kumik guang batutumu namonko.

¹⁸“Mel 3 agi 4 imi mu am mel duap bo nunguningkiri, se ani ko iki saparikko me terong:

¹⁹taraga ko munan taiti gomang te mu, mot ko munan manga awote mu, dal gagi biya awote ko munan mu, se kari imet ilak anira ko munan.

²⁰“Imet kari ilak diram bagara mena ko munan mu, kari kigilik ilak tere naso ale numi nungurso ale balso, ‘Mel bo ningi memek mena,’ iwita balso.

²¹“Munan 3 agi 4 imi arataso mu memek biya se ali wanara ko kaposo:

²²Ura kari yam king kuwim taso, kari ngualara wore kumik ko na inang suen biya,

²³ari mera imet bo laga, mena ningi kari taso, se ura imet ko dom imet kuwim taso ale ko dom kari mu ilak naso giso.