Proverbs 2:6-21

⁶Mu awuk, Yawe ikia sinar nangarso; nu kota ikia ningo se ko nunguning ko duap.

⁷Nu ikia sinar ningo umu kariimet munan diram karosan mu nungarso; nu nunga karem baga se,

⁸nunga bagara aolak bitarso ale nunga sangarso.

⁹Aga namar, ni uwuta bitar mu asele ka ikia sinararuk se ikia ningo diram te la aolak ilu se lagerko.

¹⁰Se ikia sinar mu gemang motam ningi kapa daigok, se ikia ningo mu kamin te yawarakala anirukko.

¹¹Sinar la bagara ko munan mu ka bituok se sinar karogo la aolak ilupko.

¹²Ikia sinar mu ka sanguk se kariimet memek se munak diram me bala alo mu nomolak me karoko.

¹³Nuna lage diram mu beteman ale tiromorom ningi aolak ilu se,

¹⁴munan memek betemonko kua gilingisan, ale munan memek mu ko amilmilasan.

¹⁵Nuna diram me aolak ilusan, ale nunga munan mu kawel karogo la.

¹⁶Ikia sinar mu ka kiti gurugok se imet kari ilak diram me bagara mu ko kawel te se ko den welang te me dagulko.

¹⁷Nu kulak la Kaem koma te ko kari ilak numi kuting iluwam mu mel yam ko beteram, ale ko kari beteram.

¹⁸Nunguningta, imet umu ilak ko kawam te yumu namara mu, kuera mutim ningi aolak ilu nama kam.

¹⁹Kari awiriya imet mu ilak yumu namasan mu, udagi bagara ningo ko lage te me pila tai gilingisan.

²⁰Buta se ni kari ningo diram alo mu nunga nomolak karo ale lage diram la mu te bagerko.

²¹Mu awuk, kari munan ningo diram karo tusan, mu ali imi te bagamonko.